Английн Премьер лигийн “Ливерпуль” клубын ахлагч Стивен Жеррард багтайгаа урт хугацааны гэрээ байгуулсан байна. 1998 оны арваннэгдүгээр сард тус багийн өмсгөлтэй анхны тоглолтдоо оролцож байсан Жеррард урт хугацааны гэрээ үзэглэснээр хөлбөмбөгчийн замналаа төрөлх хотынхоо багт өндөрлүүлэхээр шийдэв бололтой.

Лхагва гаригийн орой Карлингийн цомын тэмцээний хагас шигшээгийн эхний тоглолтоо “Манчестер Сити” клубын талбайд хийж, 1:0 харьцаатай ялалт байгуулсан “Ливерпуль”-ийн удирдлага тэрхүү тоглолтын гол баатар нь байж, цорын ганц гоолыг оруулсан Жеррардад тэр орой нь шинэ гэрээний санал тавьжээ.  “Ливерпуль”-тэй хувь заяагаа холбосон тэрбээр тус багийг төлөөлж 566 тоглолт хийсний 394 нь Премьер лигийн тоглолтууд аж. Энэ хугацаанд тэрбээр 144 гоол оруулсан байна.