Ардчилсан Үндсэн хууль баталс­ны 20 жилийн ой маргааш тохионо. Энэ үйл явдалд Засгийн газраас онц­гойлон анхаарал хандуулж байгаа бөгөөд Ардын нам ч ихээхэн ач холбогдол өгч байгаа юм. Учир нь 1992 оны Монгол Улсын Үндсэн хууль нь хүний эрх, эрх чөлөөг батал­гаажуулсан анхны ардчилсан Үндсэн хууль бөгөөд тухайн үед Үнд­сэн хуулийг батлалцсан 430 депату­тын 70 гаруй хувь нь Ардын намын гишүүн байжээ. Тиймээс Ардын намынхан ардчилсан Үнд­сэн хуулийг батлалцахад гар бие оролцож явсан депутатуудаа өчиг­дөр Тусгаар тогтнолын ордонд хү­лээн авч, хүндэтгэл үзүүлэн, дур­самж хэлэлцүүлэг өрнүүлсэн юм. “Ардчилсан Үндсэн хууль-20” дур­самж хэлэлцүүлэгт Ардын намын дарга, Ерөнхий сайд С.Батболд, УИХ-ын дарга Д.Дэмбэрэл, Ардын намын Ерөнхий нарийн бичгийн дарга У.Хүрэлсүх, Нарийн бичгийн дарга Я.Содбаатар, Ц.Сүхбаатар на­раас гадна Ардчилсан Үндсэн хуу­лийг батлахад томоохон үүрэг гүй­цэтгэсэн УИХ-ын гишүүн Д.Лүн­дээ­жанцан нар хүрэлцэн ирж Ардын их хурлын депутатуудтай хөөрөлдөн, цаашид хийх гэж буй зүйлээ танилцуулсан юм. Хэлэлцүүлгийг нээж Ерөнхий сайд С.Батболд хэл­сэн үгэндээ “Ардчилсан Үндсэн хуу­лийг баталснаас хойш 20 жил өн­гөрчээ. Та бүхэн ард түмнийхээ итгэ­лийг даан хүлээсэн үүргээ нэн хариуц­лагатайгаар биелүүлсэн гэдгийг ит­гэл төгс хэлмээр байна. Та бүхэнд хойч үе тань баярлан, бахархаж байна. Та бүхний баталсан ардчилсан Үндсэн хууль бидний амьдралд өөрчлөлт, дэвшлийг авчирсан. Ту­хайл­бал, бид хувьдаа газар, орон сууцтай болсон байна. Хүссэн үедээ гадаад руу чөлөөтэй явах боломжтой боллоо. Наймаа хийхийг гэмт хэрэгт тооцдог байсан бол энэ нь ариун цагаан хөдөлмөр болж. Хөдөлмөрч бол хэнээс ч дутахгүйгээр сайхан амьдрах үндэс нэгэнт бүрджээ. Өөрс­дийн үзэл бодлоо чөлөөтэй илэрхийлж ардчилсан зарчмаар сон­годог, бас хариуцлага тооцдог болсон байна. Зөвхөн дарга нар л машин унадаг байсан бол өнөөдөр 5-6 өрх тутмын нэг нь хувьдаа ма­шин­тай болжээ. Энэ боломжийг бидэнд нээж өгөхийн тулд та бүхэн их хөдөлмөр зарцуулжээ” хэмээхэд танхимд хуран чуулсан Ардын их хурлын депутатуудын заримынх нь нүдэнд нулимс цийлэгнэж, алга нижигнэтэл ташиж байлаа. Удаан уулзалдаагүй журмын нөхөдтэйгээ намынхаа ачаар нэг дор цугласан депутатуудын баяр дээр баяр нэмж УИХ-ын дарга Д.Дэмбэрэл УИХ-аас АИХ-ын депутатуудын амьдрал ахуйд нь тус дэм болох үүднээс тусламж үзүүлэхээр шийдвэрлэснийг дуулган, хуучнаа дурссан юм. Мөн УИХ-ын гишүүн Д.Лүндээжанцан “Та нартайгаа уулзахад сайхан байна. Бидний баталсан Үндсэн хууль үнэхээр суурь сайтай хууль болсон гэдгийг хэлмээр байна. Тиймээс та бүхний хойч үедээ өвлүүлсэн Монгол Улс, бүтээсэн гавьяа асар их байгаа” хэмээсэн юм. Тэрбээр Ардын их хурлын 15 дугаар тойргийн депутат байснаа дурсаж, тэр үед Үндсэн хуулийг батлуулахын тулд ямар их бэрхшээлтэй тулгарч давж туулснаа журмын нөхөдтэйгөө хөөрөлдөж, дурсамжаа сэргээсэн билээ. Энэ үеэр Ардын их хурлын 42 дугаар тойргийн депутат, бүлгийн дарга асан Б.Даш-Ёндон хүрэлцэн ирсэн депутатуудаа төлөөлөн намынхаа удирдлагуудад хандан “Бид бүхнийг хүлээн авч уулзан хүндэтгэл үзүүлж байгаад тань талархаж байна. Бидний өвлүүлсэн түүхийг хойч үе маань нэр төртэйгөөр үргэлжлүүлэн бичиж байгаагаар их бахархдаг. Тухайн үед бид ардчилсан Үндсэн хуулийг батлахдаа Монголын иргэн бүрийн саналыг авч оюун санааны шинэчлэл хийсэн гэж үздэг. Түүнээс хойш 20 жил өнгөрчээ. Бидний дундаас олон ч гавьяатнууд төрсөн дөө. Харин одоо бид хөгширсөн байна. Зарим маань бурхан болжээ. Гэхдээ тэд биднийг буруу сонголт хийгээгүй гэдгийг харж байгаа байх. Бидний түүхийг үргэлжлүүлэн бичиж яваа залгамж халаа маань бидний баталсан Үндсэн хуулийг цаашид дордуулахгүйгээр авч явна гэдэгт итгэлтэй байна” хэмээхэд депутатууд түүнийг дэм­жиж байв. Тухайн үеийн Ардын их хуралд есөн эмэгтэй гишүүн байжээ. Тэдний хоёр нь хорвоогийн мөнх бусыг үзүүлсэн ч үлдсэн долоо нь дурсамж хэлэлцүүлэгт хүрэлцэн иржээ. Тэд бол Д.Мөнхөө, Т.Жагай, Ж.Даваабал, О.Долгорсүрэн, Д.Чу­луун, Д.Баасанхүү, Э.Энхтуяа нар юм.  НАМЭХ-ныхон уржигдар тэд­нийг хүлээн авч хүндэтгэл үзүүлсэн бөгөөд хүндэтгэлийн ёслолд тус холбооны гишүүдээс гадна их, дээд сур­гуулийн оюутнууд, ерөнхий бо­ловс­ролын сургуулийн ахлах ангийн сурагчид оролцож мөн хүндэтгэл үзүүлсэн аж. Ардчилсан Үндсэн хууль баталсны 20 жилийн ойг Ардын намынхан хүндэтгэл, дурсамж, хэ­лэлцүүлэг дүүрэн өрнүүлж байна.