2011 оны арванхоёрдугаар сарын 6-ны өдрийн Засгийн газрын хуралдаанаар “Эрдэнэс Оюутолгой” компанийг байгуулах асуудлыг хэлэлцэж, шийдвэр гаргасан билээ. “Эрдэнэс МГЛ” компанийн охин компани хэлбэрээр “Эрдэнэс Оюутолгой” төрийн өмчит хязгаарлагдмал хариуцлагатай компанийг байгуулахаар шийдвэрлэсэн бөгөөд энэ компани нь Оюутолгой ордын ашиглалтын тусгай зөвшөөрөл эзэмшигч “Оюутолгой” компанийн төрийн мэдлийн хувьцааг эзэмших эрхийг хэрэгжүүлэх үндсэн чиг үүрэгтэй юм.

“Эрдэнэс Оюутолгой” компанийн Гүйцэтгэх захирлаар Өмнөд хилийн боомтуудыг хариусан Засгийн газрын бүрэн эрхт төлөөлөгчөөр ажиллаж байсан Д.Батбаатарыг томилсон байна. “Эрдэнэс Оюутолгой”-н Гүйцэтгэх захирал нь компанийн  хөрөнгө оруулалтын асуудлыг зохицуулж, хөрөнгө оруулагчдад Засгийн газрын бодлого шийдвэрийг таниулах үүрэг хүлээх аж. Д.Батбаатар өмнө нь Ерөнхий сайдын зөвлөх, УИХ-ын гишүүн, УИХ-ын Тамгын газрын Ерөнхий нарийн бичгийн дарга, Улсын мэргэжлийн хяналтын ерөнхий газрын даргын албыг хашиж байсан юм.