Ардчилсан намын Үндэсний зөвлөлдөх хорооны гишүүд намын дарга Н.Алтанхуягийг ажлаа хийж чадахгүй унагасан гэж буруутгаж байна. Мөн улс орны эрх ашигт хамаарах ажил дээр ч хөдөлдөггүй гэж шүүмжиллээ. Тухайлбал, Үндэсний зөвлөлдөх хорооны гишүүн Б.Мөнхтуяа “Монгол Улсад өнөөдөр нефтийн асуудал хүнд байгаа. Бизнес эрхэлдэг хүнийхээ хувьд гурван жилийн хугацаанд нефтийн үйлдвэр байгуулах санаатай хөөцөлдөөд арга сүүлд нь намын дарга дээрээ ороод энэ тухай хэлтэл Н.Алтанхуяг дарга “Гадаадын хөрөнгө оруулалтаар энэ үйлдвэрийг чинь барих гэж байгаа юм билээ ш дээ. Түүнийг л би дэмжинэ гэж хариулсан. Хэчнээн гомдсон гээч” гэвэл Н.Алтанхуяг дарга “Уучлаарай, чи худлаа ярьж байна” гэв. Харин Б.Мөнхтуяа “Таны яриаг Батж.Батбаяр гэрчилнэ. Би худлаа яриагүй” гэлээ. Тэрбээр мөн Эрдэс баялаг, эрчим хүчний дэд сайд Б.Ариунсанд очиж, нефтийн үйлдвэр байгуулах хүсэлтээ илэрхийлэхэд “Наадах чинь бидний хийдэг ажил биш, тэр дарга нарт оччихсон юм билээ” гэж хариулж байсан. Засгийн газрын гишүүд байж, ингэж болохгүй. Энэ улс оронд үндэсний хөрөнгө оруулалттай нефтийн нэг ч гэсэн үйлдвэр байгуулах хэрэгтэй байна шүү дээ. Түрүүн Х.Баттулга сайд хэлсэн, Монгол Улсыг түүхий эдийн орон болгох 70 жилийн гэрээг Засгийн газар өнөөдрийн хуралдаанаараа хэлэлцэх гэж байна гэж… Үүний эсрэг тэмцэх ёстой, хэчнээн жил бид гадаадын хавсарга орон болж явах юм бэ. Тийм учраас намын дарга Н.Алтанхуяг та даргын суудлаас огцрох цаг болсон” гэв.

Өвөрхангай аймгийн Ардчилсан намын дарга Т.Хасбаатар гурван асуудлыг энэ удаагийн хуралдаанаас шийдэх ёстой гэлээ. Нэгдүгээрт, намын ээлжит бус их хуралдуулах тухай асуудлыг шийдвэрлэх. Хоёрт, залуучуудаа Ардчилсан нам яаж дэмжиж ажиллах вэ гэдгээ тодорхой болгох. Гуравт, уул уурхайн их баялгийг ард түмэндээ тэгш хуваарилах тухай асуудлыг Үндэсний зөвлөлдөх хорооны хуралдаанаар хэлэлцээд Их хуралд оруулах ёстой гэсэн хүсэлт байлаа.

Мөн Үндэсний зөвлөлдөх хорооны гишүүн н.Туул “Засгийн газрын бүрэн эрхийн хугацаа дуусахад ердөө зургаахан сар дутуу байхад намын дарга Н.Алтанхуяг гарах тухайгаа бусадтайгаа зөвшилцөлгүй, хоёулхнаа шахам шийдэж мэдэгдсэн нь туйлын буруу алхам болсон. Үүнээс болж МАН-ынхан ч шоконд орсон. Гэнэт огцом шийдвэр гаргахаар тэгсэн байлгүй. Тэртэй тэргүй Ардчилсан нам хамтарсан Засгийн газрын бүрэлдэхүүнд орж ажилласнаар ямар үр дүн гарав, гэрээнд зааснаас юу нь хэрэгжээгүй вэ гэдэг дээр ард түмэн үнэлэлт дүгнэлт өгч суугаа шүү дээ гэсэн юм.

Энэ удаагийн 35 дугаар хуралд оролцож буй Үндэсний зөвлөлдөх хорооны гишүүдийн хувьд  “МАН-тай нэгдэн Засгийн газар байгуулах болохоор Үндэсний зөвлөлдөх хороог хуралдуулдаг. Засгийн газраас гарах болохоороо намын дарга ганцаараа шийдвэр гаргадаг байж болохгүй. Яагаад Ш.Түвдэндоржоос эхлээд УИХ дахь намын бүлэгтэйгээ ярилцаж болдоггүй юм бэ. Таван сайдтайгаа ч ярилцсан юмгүй. Тэгснээ гэнэт гарах тухай асуудлыг хэлэлцүүлнэ гээд Үндэсний зөвлөлдөх хороог хуралдуулдаг байж таарахгүй” гэдгийг ч хэлж байна. Харин Ардчилсан намын дарга Н.Алтанхуяг “Өөр юу хэлмээр байна, бүгдийг хэл” хэмээн гишүүдийнхээ үгийг аль болох тайвнаар хүлээж авахыг чармайж байна. Гэхдээ одоо хуралдаан хаалттай горимд шилжээд байна.