Афганистан улсад энхийг сахиулах ажиллагаанд оролцсон Монгол Улсын цэргийн багийн нэгдүгээр ээлжийн дайчид Чингис хаан нисэх онгоцны буудалд 12.30 цагт газардах ёстой байсан ч хойшиллоо. “Тогтвортой эрх чөлөө” ажиллагаанд оролцсон Монголын цэргийн баг одоо Киркизид байгаа юм байна. ОХУ-ын Хил хамгаалах газраас хил нэвтрэх зөвшөөрөл олгох ажил удааширснаас ийн саатаж байгаа аж.
Албаны эх сурвалжийн мэдээлж байгаагаар нийт 130 дайчин хоёр хуваагдан ирэх бөгөөд эхний ээлж нь 15.00 цаг орчим газардах аж. Монголын дайчид Афганистаны нийслэл Кабул хотноо байрлах АНУ тэргүүтэй олон үндэстний цэргийн “Eagers” баазын аюулгүй байдал, харуул хамгаалалтын үүргийг амжилттай гүйцэтгэжээ. Нэгдүгээр ээлжийн цэргийн багийн бүрэлдэхүүний 80 гаруй хувь нь өмнө нь НҮБ-ын мандаттай энхийг сахиулах болон олон улсын бусад ажиллагаанд 1-3 удаа үүрэг гүйцэтгэж байсан Зэвсэгт хүчний 18 анги, байгууллагын 120 офицер, ахлагч юм.