Швейцарийн Цюрих хотыг хөлбөмбөгөөр амьсгалуулсан нэгэн чухал арга хэмжээ өчигдөр болсон нь хөлбөмбөгийн ертөнцийн шилдгүүдийг нэрлэж, дэлхийн шилдэг хөлбөмбөгчид Ballon d’Or гардуулах гала арга хэмжээ байлаа. Харин энэ үдшийн од нь эргэлзээгүйгээр Лионель Месси байсан. Тэрбээр гурав дахь жилдээ дараалан дэлхийн шилдэг хөлбөмбөгчөөр шалгарч байна. Хөлбөмбөгийн түүхэнд ийм амжилт үзүүлсэн тоглогч ердөө гурав бий. Харин гурван жил дараалан шилдгээр шалгарсан тохиолдол Мишель Платинигаас хойш хоёр дахь нь болж байна.

Тэрбээр шагналаа гардан авсны дараа сэтгүүлчдийн асуултад ийн хариулжээ.

-Мишель Платини гурван жил дараалан Ballon d’Or хүртсэнээс хойш ийм хэмжээний амжилтад хүрсэн анхны тоглогч нь та боллоо?

-Гурван удаа, ингэхдээ дараалан гурван жил хүртсэндээ үнэхээр бахархалтай байна. Яг л анх удаа хүртэж байгаа юм шиг баярлаж, талархаж байна.

-Та шагналаа багийн анд Шавид зориулж буйгаа хэлсэн. Хэрэв Шави тан руу бөмбөг дамжуулдгаа больчихвол өөрөө Ballon d’Or хүртэнэ гэж бодож байна уу?

-Үгүй ээ!!! Тэр миний тухай ямар бодолтой байдаг тухайгаа маш олон удаа илэрхийлж байсан. Би ч бас түүний адил бодолтой байдгаа хэлсэн хэрэг. Бид бие биедээ хэрэгтэй, нөхөрлөл ямар ч шагналаас илүү эрхэм шүү дээ.

-Та дөнгөж 24 настай, залуу байна. Харин бид Мессигийн оргил үеийг харж чадсан болов уу, эсвэл одоогийнхоос ч илүү зүйлийг хүлээх ёстой юу?

-Эрч хүчээ алдалгүй үргэлжлүүлж, дахиад олон цом хүртэхийг хүсч байна. Яг  л өөрөөрөө байж, өөрийнхөөрөө тоглож, шигшээ багтайгаа хамт өндөр амжилт гаргахыг хүсч байна.

-Шигшээ багтаа харуулах зүйл үүнээс ч илүү байгаа гэж үү?

-Тийм. Би шигшээ багтайгаа цом өргөхийг хүсч байна. Нэг сайхан өдөр хүсэл маань биелнэ гэдэгт итгэлтэй байна.

-Та өөрийгөө аль талаараа илүү хөгжиж, сайжирна бодож байна?

-Өмнө нь хэлж байсанчлан тоглолтоо сайжруулахыг хүсч байна. Гала арга хэмжээнд оролцох аз завшаан надад таван удаа тохиолоо, дахиад ч олон удаа эргэн ирэхийг хүсч байна.

-Асар богино хугацаанд ийм гайхалтай шагналын эзэн болно гэж бодож байв уу?

-Үнэнийг хэлэхэд тэгж бодож байсангүй. Би топ төвшинд тоглохыг мөрөөдөж байснаас энэ гайхалтай шагнал, цом надад ирнэ гэж төсөөлж ч байгаагүй.

-Иймэрхүү үдэш анхаарлын төвд байх ямар байдаг вэ. Домог болсон агуу тоглогчдоор хүрээлүүлж, бүгд таныг дэндүү залуудаа энэ амжилтад хүрснийг биширч байна шүү дээ?

-/Нүүр нь ялимгүй улайв/ Цаашид ч гэсэн хөлбөмбөгөө тоглож, энэ спортын сайхныг мэдэрч, багаа амжилтад хүргэхийг л хүсч байна даа.

-2012 оны зорилго?

-Жил бүрийн эхэнд миний зорилго ижил байдаг. Хичээх, бүхнийг амжуулахын төлөө зүтгэх.