АН-ын ҮЗХ маргааш хуралдах гэж байна. Энэ сарын 20-доор хийхээр товлосон хуралдаанаа ийнхүү наашлуулсан нь намын дарга Н.Алтанхуягийн АН Засгийн газраас гарах мэдэгдэлтэй холбоотой гэх. Анхнаасаа ҮЗХ-ны хуралдаанаар АН Засгийн газраас гарах тухай, “Монгол хүн-2020” хөтөлбөрийн тухай гэсэн хоёр асуудал хэлэлцэхээр төлөвлөөд байсан юм. Харин намын дарга Н.Алтанхуяг, УИХ  дахь АН-ын бүлгийн дарга Ч.Сайханбилэг, намын ерөнхий нарийн бичгийн дарга Д.Эрдэнэбат нар АН Засгийн газраас гарах тухай мэдэгдлийг ҮЗХ хуралдахаас өмнө зарласныг зарим гишүүд дэмжихгүй байгаа аж. Хэдийгээр намын дарга намаа төлөөлөх эрхтэй ч ингэж бодлогын том асуудлаар толгой мэдэн дуугарах ёсгүй байсан. ҮЗХ хуралдаж, ном ёсоороо уг асуудлыг тавих учиртай байсан хэмээн зарим гишүүн үзэл бодлоо илэрхийлж буй.

Н.Алтанхуяг даргын Засгийн газраас АН гарах тухай асуудлыг яаран гаргаж тавьсан нь ҮЗХ-ны хурлаар өөрийг нь намын даргаас огцруулах асуудал орох болсонтой холбоотой хэмээн үзэх хэсэг ч байна. АН хамтарсан Засгийн газарт орохыг анхнаасаа эсэргүүцэж байсан хэсэг, мөн Алтангадас фракцыг таалдаггүй хэсэг Н.Алтанхуяг даргыг намын ажлаас нь чөлөөлөх саналыг нэлээд эртнээс тавьсаар ирсэн юм. Ерөөсөө ч АН-ын ҮЗХ-ны хурал бүхэн дээр намын даргыг огцруулах асуудал сөхөгддөг нь гэм биш зан. Хорин жилийн турш л тийм явж ирсэн. Харин Н.Алтанхуяг дарга үүнийг жаахан эмзгээр хүлээн авч, Засгийн газраас гарах болсноо яаран мэдэгдсэнээрээ ҮЗХ-ны гишүүдээс бас л зэм хүртэх бололтой байна.

ҮЗХ-ны хурал дээр намын даргыг солих асуудал тэртэй тэргүй гарна. Ингэхдээ Алтангадас, МоАХ фракцийн хооронд сөргөлдөөн гарна гэж ажиглагчид бас хэлж байгаа юм. МоАХ-ны тэргүүн, УИХ-ын гишүүн Х.Баттулга намын тэргүүний суудалд санаатай гэх мессеж бас эртнээс тарсан. Тиймээс маргааш болох ҮЗХ-ны хурлаар намын даргыг огцруулдагүй юм гэхэд ямар ч гэсэн хариуцлага тооцох тухай яригдана гэдгийг ойрын эх сурвалжууд хэлж байна.