Өнгөрсөн баасан гарагийн УИХ-ын чуулганы нэгдсэн хуралдаанаар Эрүүгийн  хуульд нэмэлт өөрчлөлт оруулах тухай хуулийн төс­лийн анхны хэлэлцүүлэг бол­сон. Уг төсөл дээр нэмэгдээд Нийтийн албанд нийтийн бо­лон болон хувийн сонирхлыг зохицуулах, Сонирхлын зөрч­лөөс урьдчилан сэргийлэх тухай хуулийг өргөн мэ­дүүл­сэн юм. Хэлэлцүүлэг өрнөх явцад УИХ-ын гишүүн Батж.Батбаяр авлигын талаар өр­гөн мэдлэгтэйгээ харуулаад амжив. Түүний судалснаар Монголд цэцэрлэгийн багш хүртэл авлига авдаг гэнэ. Гэхдээ Батж.Батбаяр гишүү­нээс илүүтэй УИХ-ын гишүүн Д.Балдан-Очирын гаргасан санал сонирхолтой байв. Тэр­бээр “Төрийн 46 мянган албан хаагчийн хөрөнгө орлогын мэдүүлгийг авдаг болсноор авлига, хээл хахуультай тэм­цэж үр дүнд хүрч чадахгүй. Тэгэхээр өрх бүрээс хөрөнгө орлогын мэдүүлэг авдаг бо­лох ёстой. Улсын хэмжээнд 740 мянга гаруй өрх бий гэсэн судалгаа бий. Тэр бүгдийг хамруулах ёстой” гэж хэлэв. Ухаандаа Монгол Улсын бүх өрхийг баянаас нь ядуу хүртэл нь жагсаах санал гаргасан гэсэн үг. Гишүүн бас өөрийнхөө хэр хэмжээг мэдэж авах гэсэн байж ч болох л доо. Нийт 740 мянган өрхөөс хөрөнгийнхөө хэмжээгээр хэ­дэд жагсаж байгаагаа мэдээд авбал дараа дараадаа хэр их ажиллаж хэддүгээр байрт зогсохоо тоо­цоолсон ч байж болох. Уг нь бол жирийн иргэдийн хөрөнгө орлогын мэдүүлэг хэнд ч хэрэггүй л дээ. Угаасаа татвараа төлөөд үлдэгдлээр нь амьдарч бай­гаа айл өрхүүд л зонхилж байгаа. Харин төрийн 46 мянган албан хаагчийн хө­рөнгө орлогын мэдүүлгийг зайлшгүй авах хэрэгтэй. Хэн нь хэдэн төгрөгийн ор­лого олдог, хэрхэн мөнгө босгодгийг нь мэдэж байвал ард түмэнд л хэрэгтэй шүү дээ. Тэгэхээр Д.Балдан-Очир гишүүний санал нэг л явцгүй болж таараад байна. Түүнд өөрт нь хэрэгтэй байж болох ч улсад огт хэрэггүй. Тэгээд ч ядуурал, ажилгүйдэл газар авчихаад байгаа энэ үед ард түмний хөрөнгө орлого гэж юу байх вэ дээ. Их л бодож төрөөс өгч байгаа 21 мянган төгрөг өрх бүрт нэмэгдэнэ биз. Харин төрийн албан хаагчдын ах дүү, хамаатан садных нь хөрөнгө орлогын мэдүүлгийг авдаг болбол ямар вэ. Авлигатай тэмцье гэвэл төрийн албан хаагчдын ах дүү нарын хөрөнгийг л шалгаад байх хэрэгтэй. Манайхан ч гул­гуулж байгаа даа.