Саяхан болсон шинэ жилийн баяраар махны үнэ огцом өсч хэрэглэгчдийг багагүй бухимдуулаад авсан. Баярын үеэр нэмэгдсэн махны үнэ өнөөдрийг хүртэл огт буурсангүй харин ч улам л өссөөр байна гэж иргэд гомдоллож байна. Үүний дагуу Баянзүрх хүнсний захад махны үнэ ямар байгааг сонирхлоо.  Үхрийн цул мах таван мянга 700 төгрөгөөс зургаан мянга 800 төгрөг, ястай мах таван мянган төгрөгөөс таван мянга 200 төгрөгийн хооронд, хонины цул мах таван мянгаас таван мянга 200 төгрөг, адуу болон ямааны мах дөрвөн мянга 500-гаас дөрвөн мянга 700 төгрөгийн хооронд худалдаалагдаж байсан юм. Энэ нь өмнөх онд худалдаалагдаж байснаас 300-400 төгрөгөөр нэмэгдсэн гэсэн үг. Махны үнэ яагаад өссөн болохыг худалдагч эмэгтэйгээс асуухад

-Мах ер нь хомсдолтой бай­гаа, малчид л махаа үнэтэй зараад байгаа юм байлгүй гэсэн хариултыг өгсөн юм.

-Мал 36 сая хол давсан, махны хэрэглээгээ 100 хувь дотоодоосоо хангадаг манай орны иргэд иймэрхүү үнээр махаа худалдаж авч, хүнсэндээ хэрэглэж байгаадаа харамсч, малчдыг хараах нь ч бий. Гэтэл үнэндээ малчид малаа үнэтэй зараад өөрсдөө баяжаад байгаа хэрэг огт биш. Энд бас хэтэрхий их үнэ өсгөдөг ченжүүдийг буруутгах нь ч бий. Харин цөөн тооны бизнес эрхлэгчдийн явуулж буй  нөөцийн махны үнийг өндөр тогтоолгож өөрсдийн махаа ахиу үнээр зарах гэсэн бодлогын чанартай мөлжлөг гэх хүн ч бас байна. Үнэтэй мах худалдан авч, хүнсэндээ хэрэглэхээс халширсан ард иргэд  нөөцийн мах гарч ирэхийг тэсэн ядан хүлээж байгаа нь мэдээж. Зах зээлийн үнээс харьцангуй доогуур үнээр худалдаалагддаг нөөцийн махыг хэзээ худалдаанд гаргах, ямар үнэтэй, хэдий хэр хэмжээний мах гаргах талааар Нийслэлийн захирагчийн ал­баны хүнсний хангамж хариуцсан мэр­­гэжилтэн О.Уянгаас тодруулсан юм.

-Сүүлийн үед махны үнэ нэлээд өсөж иргэдийг бухим­дуу­лаад байгаа. Зах зээлийн үнээс доо­гуур зарагддаг Нөөцийн мах яг хэзээнээс худалдаанд гарах юм бол. Хэдэн төгрөгөөр худал­даалахаар төлөвлөөд байгаа вэ?
 
-Энэ жил Нийслэлийн хэмжээнд 22 гаруй аж ахуй нэгжийн бэлтгэсэн 12 мянган тонн нөөцийн махыг энэ сарын 15-наас худалдаанд гаргахаар төлөвлөөд байна. Ингэхдээ нийслэл дүүргийн хороо болгонд 2-3 цэг буюу үйлчилгээний төв дэлгүүрүүдээр ху­дал­­­даална.  Харин хэдэн төгрөгөөр зарахыг шийдээгүй байгаа. Зах зээлийн судалгаа хийж байж шийднэ. Ямар ч бай­сан гадуур худалдаалж буй махны үнээс нэг мянган төгрөгөөр доогуур зара­хаар төлөвлөсөн. Ирэх долоо хоно­гийн сүүлээр бараг үнээ тогтоочих байх.

-Худалдаанд гаргахаар тө­лөв­лөөд байгаа уг нөөцийн мах иргэдийн хэрэгцээнд хэр хүр­тээмж­тэй байх юм бол. 12 мянган тонн махаар хэр хугацаанд ир­гэ­дийн хэрэгцээг хангаж чадах вэ?

-Өнгөрсөн жил бас 12 мянган тонн мах нөөцөлж, зургадугаар сар хүртэл худалдаалсан. Энэ жил ч мөн тийм байх болов уу гэж бодож байна.

-Нөөцийн мах удаан хугацаанд хадгалагдаж, шилэгдэн хуучирсан байдаг гэх иргэд байдаг. Үүнийг зохицуулах, иргэдэд чанартай хямд үнэтэй нөөцийн махыг худал­даалах талаар ямар нэгэн ажлыг зохион байгуулсан уу. Үүнийг яаж шийдэх вэ? 

-Өнгөрсөн жил худалдаанд гарсан 12 мянган тонн мах бүгд зарагдаж дууссан. Тийм болохоор энэ жил ч тйимэрхүү асуудал гарахгүй болов уу. Нөөцийн махыг худалдаанд гаргаж буй гол зорилго нь иргэдийг хямд үнэтэй махаар хангах, махны үнийг тогтворжуулах, нийлүүлэлтийг нэмэгдүүлэх л гэсэн бодлого шүү дээ гэсэн юм.