Монголын чөлөөт бөхийн холбооноос өнгөрсөн жилийн насанд хүрэгчдийн улсын аварга шалгаруулах тэмцээнийг “Mongolian Open” нэрээр шинэлэг хэлбэрээр зохион байгуулж, олон орны шилдэг тамирчдыг далласан билээ. Улмаар Олон улсын бөхийн төрлүүдийн нэгдсэн холбооны тэмцээн, уралдааны хуанлид багтсанаар энэ жил FILA-д бүртгэлтэй “А” зэрэглэлийн албан ёсны олон улсын тэмцээн болж, зохиогдох юм. Нэгдүгээр сарын 14, 15-нд Буянт-Ухаа дахь Спортын шинэ ордонд болох “Mongolian Open-2012” тэмцээнд одоогийн байдлаар ОХУ, АНУ, Япон, Хятад, Болгар, Румын, Чех, Иран, БНАСАУ, Франц, Казахстан зэрэг 15 орны баг тамирчид хүрэлцэн ирж, оролцохоо албан ёсоор мэдэгдээд байна.