"South gobi sands" буюу “Өмнийн говь” компани 49 ажилтнаа үндэслэлгүй шалтгаанаар ажлаас халсан гэсэн шалтгаанаар өчигдөр тус компанийн ажилчид эсэргүүцэл илэрхийлж, удирдлагуудаа уулзахыг шаардсан юм. Тэгвэл энэ шаардлагын дагуу өнөөдөр өглөөний 08 цагт компанийн удирдлагууд ажилтнуудтайгаа уулзсан байна. Энэхүү уулзалтаар ямар нэгэн бодитой шийдэлд хүрээгүй ч хоёр талаас гурав, гурван хүний төлөөлөл гарган, албан ёсоор хэлэлцээ хийх талаар ярилцжээ.

Ажилтнуудын зүгээс гурав биш таван  хүний бүрэлдэхүүн бүхий төлөөллийг уулзуулна гэсэн санал гаргасан бөгөөд одоогийн байдлаар тэдний зүгээс хоёр хуульч, гурван ажилтнаас бүрдсэн төлөөллөө сонгоод байгаа гэлээ. Өнөөдөр өглөө болсон уулзалтын үеэр ажилчдын нийгмийн даатгалын дэвтрийн бичилтийг олон дахин баллаж,  ажлаас чөлөөлөгдсөн гэх он, сарыг юуны учир будлиантуулсан тухай ажилтнууд асуухад удирдлагуудаас ямар нэгэн тайлбар өгөөгүй гэнэ. Дөнгөж сая авсан мэдээллээр бол ямартай ч хоёр талаас төлөөллөө сонгосны дараа буюу өнөөдөр 14 цаг, эсвэл 16 цагт тэд эргэн уулзахаар болжээ.