Италийн суут хөгжмийн зохиолч Ж.Пуччини гайхамшигтай олон дуурь бичиж, дэлхийн хүн төрөлхтөнд бэлэглэсэн. Одоо хэр нь түүний “Чио Чио Сан”, “Тоска”, “Богема”, “Турандут” дуурь үзэгч, сонсогчдийг бишрүүлсээр байгаа. Эдгээр дуурь нь манай Улсын дуурь, бүжгийн эрдмийн театрын тайзнаа аль хэдийнэ тавигдаж, уран бүтээлчдийн бяр, чадлыг шалгахаас гадна сонгодог урлагт дуртай үзэгчдийн мэлмийг баясгасаар байгаа. Энэ дундаас Ж.Пуччинийн “Тоска” дуурь энэ сарын 7-нд 30 жилийн ойтой золгож байгаа бас л хувь тохиол. Тус дуурийн цомнолыг Ж.Жакоза, Л.Иллика нар зохиож, анх 1900 оны нэгдүгээр сарын 14-нд Ром хотын “Костанци” театрт тогложээ. Тухайн үед алдарт жүжигчин С.Бернартад зориулж В.Сардугийн “Флория Тоска” жүжгээс сэдэвлэн цомнолыг бичсэн байна. Ж.Пуччини тухайн үед В.Сардугийн “Флория Тоска” жүжгийг үзээд сэтгэл нь маш их хөдөлж, уг дуурь бүтсэн аж. “Тоска” нь Ж.Пуччинийн хамгийн хүнд драмтай дууриудын нэг бөгөөд авьяаслаг, үзэсгэлэнтэй хэдий ч сэтгэлийн хөдөлгөөн, хартай, гэнэн бүсгүй Тоска, мөрөөдөмтгий, мэдрэмтгий, шулуун шударга Каварадосси, санаа муутай, харгис Скарпья нарын дүрийг хөгжмийн аялгуугаар маш тодорхой гаргаж өгсөн нь сонсогч, үзэгчдийн сэтгэлийг ихэд татаж, одоо хэр нь бишрүүлж буй.
Манай дуурийн тайзнаа “Тоска” 1982 оны нэгдүгээр сарын 9-нд анх тоглогдож, Урлагийн гавьяат зүтгэлтэн Л.Эрдэнэбулган найруулсан байдаг бол зураачаар ардын зураач Ч.Гунгаасүх, удирдаачаар Ч.Жамсранжав ажиллаж байжээ. Тэр үед А.Хавлааш, Х.Уртнасан, н.Банди гээд манай мундагчуул тоглож, үзэгчид энэ дуурийг хүргэсэн байдаг. Түүнээс хойш энэ дуурь олон уран бүтээлч хүчээ сорьж ирсэн бөгөөд энэ сарын 7-нд 30 жилийн ойгоор тоглогдох “Тоска”-гийн Флория Тоскад  С.Мөнгөнцэцэг, зураач Марио Каварадоссид Б.Дамдинсүрэн, Чезаре Анжелоттид М.Болд, гүн Скарпьягийн дүрийг Ц.Баттөр нар бүтээхээр болсон нь энэ. 1994 онд “Тоска” дуурийг хоёр дахь тавилтаар тоглоход нь урлагийн гавьяат зүтгэлтэн Ж.Бүрэнбэх удирдаж, энэ найруулгаараа одоо хэр нь үзэгчдэд хүрч байгаа юм. Дуурийн үйл явдал, өрнөл нь хөгжмийн хэлээр шууд буухаас гадна төгсгөлийн эмгэнэлтэй хэсэг нь хүний сэтгэлийг сэрт хийлгэж чаддаг нь гайхалтай. Тиймдээ ч мэргэжлийн талаас асар их ур чадвар шаарддаг гэдэг. Улсын дуурь, бүжгийн эрдмийн театрын тайзнаа “Тоска” дуурь 30 жилийн хугацаанд тавигдахад Польш, Оросын дуучин ирж дуулж байжээ. Мөн Ардын жүжигчин Б.Жавзандулам, Гавьяат жүжигчин А.Дашпэлжээ болон гоцлол дуучин Б.Эрдэнэтуяа нар тоглож байсан юм.