Монголын жүдо бөхийн холбооны хамт олон арванхоёрдугаар сарын 30-ны өдөр 2011 оны амжилт, ажлаа дүгнэн, шинэ жилийн баяраа тэмдэглэлээ. Энэ өдөр Монголын жүдо бөхийн холбооны хамт олонд баярт үйл явдал тохиож, “Аврагч” спорт хорооны дасгалжуулагч Ц.Шийрэв Хөдөлмөрийн гавьяаны улаан тугийн одон, “Женко” клубын дасгалжуулагч Ш.Цэвэлмаа, жүдо бөхийн үндэсний шигшээ багийн тамирчин, ОУХМ С.Мияарагчаа, П.Лхамдэгд, Д.Төмөрхүлэг нар Алтангадас одон хүртсэн байна. Түүнчлэн шинэ жилийн баярын өдрөөрөө олимпийн аварга Н.Түвшинбаяр БНСУ-ын хүмүүнлэгийн байгууллагын дээд одонгийн эзэн болж, баяр дээр баяр нэмжээ.

2011 онд тив, дэлхийн дэвжээнээс 24 алт, 26 мөнгө, 40 хүрэл, нийт 90 медаль хүртэж, Монголд жүдо бөх үүсч хөгжсөний түүхт 40 жилийн ойгоо амжилт, ялалтаар дүүрэн үдсэн Монголын жүдо бөхийн нийт хамт олон, үе үеийн жүдочдодоо шинэ оны баярын мэнд хүргэе. Шигшээ багийн тамирчдадаа 2012 оны цуврал тэмцээнүүддээ амжилттай зодоглож, Лондонгийн олимпийн эрх олныг өвөртлөн, эх орон, ард түмнээ ирэх олимпийн наадмаар баярлуулна гэдэгт итгэж байна.