Эрүүл мэндийн яам, Монголын эрүүл мэндийн ажилтны үйлдвэрчний эвлэлийн холбоотой хамтран ажиллах гэрээнд өнөөдөр гарын үсэг зурлаа. Гэрээнд Эрүүл мэндийн сайд С.Ламбаа болон Монголын эрүүл мэндийн ажилтны Үйлдвэрчний эвлэлийн холбооны дарга Б.Мягмар нар гарын үсэг зурсан юм.

Монгол улсын үйлдвэрчний эвлэлүүдийн эрхийн тухай хуулийн тавдугаар зүйлийн 1, хөдөлмөрийн хөлсний доод хэмжээний тухай хуулийн 5.5.3-т зэрэг заалтуудыг үндэслэн энэхүү хамтран ажиллах гэрээг байгуулсан байна. Хэлэлцээрийн зорилго нь эрүүл мэндийн салбарын хөдөлмөрийн харилцаанд оролцогч талуудын хууль ёсны эрх, ашиг сонирхлыг хамгаалж баталгаажуулах, ажилтнуудын хөдөлмөр, нийгмийн хамгааллын асуудлыг дэс дараатай шийдвэрлэхэд оршиж байгаа аж.