Английн хатан хааны “Рояал Опера” театрын гоцлол бүжигчин, балетчин Тамара Рохогийн гол дүрд нь тоглох А.Аданы “Жизель” балетыг монголчууд эх орныхоо тайзнаа үзэх гэж байна. Учир нь дэлхийн шилдэг балетчны нэг, Гавьяат жүжигчин Д.Алтанхуягийн санаачлан байгуулсан “Монголын балетын хөгжил сан”-гаас ирэх сарын 14, 15-нд А.Аданы “Жизель” балетад гоцлох саналыг Тамара Роход илгээжээ. Тэрбээр Д.Алтанхуягтай хамтран гоцлох юм. Тамара Рохо нь 10 наснаасаа эхлэн бүжиглэсэн бөгөөд гайхалтай техник нь түүнийг 1997 онд “Сонгодог Бүжгийн Урлагийн хувьсал” хэмээн нэрлэхэд хүргэсэн байна. 1994 оны Парисийн олон улсын балетын тэмцээнээс алтан медаль хүртэхэд нь шүүгчээр ажилласан Наташа Maкaровь, Владимир Викторович Васильев, Галина Сетсова зэрэг домог болсон балетчид алмайрч, гранпри шагналаас илүүд тооцогдох шүүгчдийн нэрэмжит шагналыг авч, балетын урлагийн орон зайд орж ирж байв. 

Тамара Рохо өнөөдөр ч өөрийнхөө хэзээ ч алдагдаагүй гайхалтай техник, дур булаам, сэтгэл татсан жүжиглэлт, гэрэлтсэн их авьяасаа Их Британи улсын Лондон хотын төвд орших 1732 оноос түүхтэй “Рояал Опера” театрын мянга мянган үзэгчдэд хүргэсээр байна. Түүний нэр хүнд олон улсад хэр өндөрт байдгийг илтгэх олон улсын нэр хүндтэй шагналууд нь түүнд урам зориг, ихийг хийх хүсэл тэмүүлэл өгдөг биз ээ.