“TLG-13” төрийн бус байгууллага болон “MCS Coca-Cola” компани хамтран зохион байгуулдаг Спрайт хөгжлийн лиг үргэлжилж  байна. Өнгөрсөн бямба гаригт  дивизоны аварга багуудаа тодруулсан бол ням гаригт бүсийн аваргын төлөөх цувралын эхний тоглолтууд боллоо. Нийт 48 баг  хоёр бүс дөрвөн дивизонд хуваагдан тоглосон Спрайт лигийн  баруун бүсийн “Суруга Монгол” дивизоны аваргаар “УБЦТС ХК” баг, тус бүсийн "ДХИС-ийн CRM Шонхорууд" дивизоны  аваргаар "ДХИС-ийн CRM Шонхорууд" баг, зүүн бүсийн "Танан импекс" дивизоны аваргаар "Танан импекс" баг, тус бүсийн "Эрдэнэдрийлинг RIGS" дивизоны "Эрдэнэдрийлинг RIGS" багууд тус тус шалгарлаа. Эдгээр баг дивизоны аваргын төлөөх цуврал тоглолтонд өрсөлдөгч багуудаа 2:0 харьцаатайгаар илт давуу буулган авсан юм. Бямба гаригт   болсон дивизоны аваргын цуврал хоёр дахь тоглолтонд “ДХИС-ийн CRM Шонхорууд”  баг  “Мон тед констракшн” багийг  76:59 харьцаатайгаар хожсон.  Харин шүүгчдийн зөвлөлийн шийдвэрээр  тус бүр хоёр тоглогчоо тухайн тоглолтонд оруулаагүй “МТ групп”, “УБЦТС ХК” багуудын тоглолт энэ тэнцүү өрнөж сүүлийн мөчид “МТ групп” баг довтолгоогоо  амжилтгүй болгосноор  82:85 харьцаатайгаар “УБЦТС ХК” баг хожсон юм. Дараагийн тоглолт Танан импекс болон I Chuk багуудын хооронд болж Танан импекс баг өрсөлдөгчөө 75:70 харьцаатайгаар хожсон бол  Эрдэнэдрийлинг RIGS баг Panasonic багийг 82:65 харьцаатайгаар хожсоноор дивизоны  аваргуудын нэгээр шалгарлаа. 

Спрайт хөгжлийн лигийн баруун, зүүн бүсийн аваргын төлөөх цувралын эхний  тоглолт өнгөрсөн ням гаригт баруун бүсийн  “ДХИС-ийн CRM Шонхорууд”, “УБЦТС ХК” багуудын тоглолтоор эхэлсэн бөгөөд “ДХИС-ийн CRM Шонхорууд” баг өрсөлдөгчөө 97:73 харьцаатайгаар илт давуу буулган авсан байна. Тус тоглолтонд   “ДХИС-ийн CRM Шонхорууд” багаас С.Батбаяр 25 оноо, н.Бат-Эрдэнэ 12 оноо авч багаа хожилд хүргэлээ.  Түүний дараа  зүүн бүсийн “Танан импекс” болон "Эрдэнэдрийлинг RIGS"  багуудын тоглолт болсон. Зүүн бүсийн дивизоны аваргуудын тоглолт хурдан довтолгоо, нягт нямбай хамгаалалттай болж Танан Импекс баг өрсөлдөгчөө 85:66 харьцаатайгаар ялалт байгуулснаар цувралыг 1:0 болгож байна. “Хасын Хүлгүүд” багийн шилдэг тоглогч О.Ууганбаярыг багтаа нэгтгэж чадсан Танан импекс баг Спрайт хөгжлийн лигт нэг ч хожигдолгүй цувралаа үргэлжлүүлсээр л. Тус тоглолтонд хамгийн их оноог  О.Ууганбаяр 16 оноо, Г.Алтангэрэл 14 оноо  авсан бол бусад тоглогчид жигд тоглолт үзүүллээ. Бүсийн аваргын хариу тоглолт 2012 оны 1 сарын 7,8-нд болно. Дашрамд дуулгахад Спрайт супер лиг  2012 оны 1 сарын 29-нд эхлэх бөгөөд Спрайт супер лигийн шилдэг найман баг, энэ жилийн хөгжлийн лигээс мөн найман  баг тус лигт өрсөлдөх юм.