Монголын хөрөнгийн бирж 2011 оны арванхоёрдугаар сарын 19-23-ны хооронд таван удаагийн арилжаа явуулж, нийт 72 ХК-ийн 1,7 сая ширхэг хувьцааг 6,6 тэрбум төгрөгөөр, 2,8 мянган ширхэг “Жаст агро” компанийн “Монгол мах” бондыг 28.5 сая төгрөгөөр тус тус арилжиж, нийт 6.64 тэрбум төгрөгийн гүйлгээ хийсэн байна. ТОР-20 индекс 20251.33 нэгжид хүрч, өмнөх долоо хоногоос 1736.31 нэгжээр буюу 9.4%-иар өсчээ. Индексийн сагсад багтах АПУ /27.3%/, Багануур /17.3%/, Могойн гол /13.0%/, УИД /8.7%/, МЦХ /3.7%/, Ремикон /2.9%/, Таван толгой /2.3%/, Шарын гол /2.2%/, Говь /2.0%/, Шивээ овоо /1.4%/ зэрэг ХК-ийн үнэт цаасны ханш өссөн нь индексийн өсөлтөд нөлөөлсөн байна.

Зах зээлийн нийт үнэлгээ 121.7 тэрбум төгрөгөөр буюу 6.4%-иар өсч, 2 их наяд 15.1 тэрбум төгрөг болсон байна. Ханш нь хамгийн их өссөн үнэт цаасны тоонд Бөхөг /100.9%/, УСИБ /100.8%/, Чацаргана /45.4%/ ханш нь хамгийн их буурсан үнэт цаасны тоонд Сор /28.9%/, Азиа пасифик пропертис /24.9%/, Гурил тэжээл булган /18.9%/ зэрэг ХК-иудын үнэт цаас орж байна.

Нийт 72 үнэт цаас арилжсанаас 43 үнэт цаасны ханш өсч, 21 үнэт цаасны ханш буурч, 8 үнэт цаасны ханш тогтмол байлаа. Тоо ширхгээр хамгийн олон ширхэг арилжсан үнэт цаасанд АПУ /1.1 сая ширхэг/, Оллоо /339.7 мянган ширхэг/, Шарын гол /109.6 мянган ширхэг/ компанийн үнэт цаас орж байна.

Үнийн дүнгээр АПУ /5.0 тэрбум төгрөг/, Шарын гол /1.2 тэрбум төгрөг/, Азиапасифик пропертис /153.2 сая төгрөг/ компанийн үнэт цаас арилжсан байна.