-Хэдэн хоногийн өмнө УИХ-ын гишүүн Х.Тэмүүжин “Хар дэвтэр” хэмээх нэгэн баримт дэлгэсэн. Мөн бууны сумны хонгионы талаар ч ам нээлээ. Та тухайн үед биеэрээ байсан хүний хувьд юу гэж дүгнэж байна?

-Би 2008 оны долоодугаар сарын 1-ний үйл явдал эхлэхээс төгсөх хүртэл тэнд байж санал хураалтын булхайнуудыг нү­дээрээ харсан хүн. Х.Тэмүүжин гишүүн хуульч хүн байж үнэхээр хариуцлагагүй зүйл ярьж байна. Түүний дэлгэсэн баримт гэх дэвтэр ямар ч ор үндэсгүй зүйл. Мөн өгүүлж байгаа баримтууд нь дотроо логикгүй, авцалдаагүй байсан.

-Яагаад авцалдаагүй гэж. Та нарт тэр дэвтрийг үндэслэлгүй гэх баримт байгаа юм уу?

-Учир нь “Хар дэвтэр”-т гарч буй бууны гол төмрийг өөрчлөхөд гурван метр нүх ухалцсан гэх долоон цагдаагийн нэрийн талаар юм. Тэр цагдаа нарын зарим нь тухайн үед Ганц худагт хоригдож байсан. Жишээлбэл, н.Төмөрбаатар, н.Бат­дорж нар. Яахаараа шоронд байсан хүмүүс гэнэт гарч ирээд эд мөрийн баримтаа нуудаг билээ. Тийм ямар ч боломж байхгүй шүү дээ. Бас тэнд нэр нь бичигдсэн нэг цагдаагийн хөл хугарчихсан гэртээ хэвтэж байсан. Мөн Х.Тэ­мүүжин бууны хонгио үзүүлж байна лээ. Хонгиог хэн ч хаана ч буудаад гаргаж ирж болно шүү дээ. Шалгалтын явцад тэр хонгиог цагдаа нарын бууных мөн, бишийг огтхон ч нягталж, шалгаагүй та­лаар мэдээлэл бий. Түүнчлэн Улсын ерөнхий прокурорын газрын дэргэдэх Мөрдөн байцаах албаны дарга Б.Галдаа хууль зөрчсөн яриа өгсөн байна лээ.

-Яагаад хууль зөрчсөн гэж?

-Тэрхүү “Хар дэвтэр”-ийг шүү­хээс хэргийн нотлох баримт мөн гэж эцсийн шийдвэр гаргаагүй байхад дэвтэрт дурьдагдсан мэдээллийн дагуу цагдаа нарыг гэм буруутай хэмээн нотолгоогүй зүйл ярьсан.

-Тэгэхээр та цагдаа нарыг үймээний үеэр байлдааны сум хэрэглээгүй гэх гээд байна уу?

-Тийм ээ. Цагдаа нар Цагдаагийн байгууллагын тухай хуулийн 40 дүгээр зүйлд заасны дагуу бослогын үеэр галт зэвсгийг зохих журмын дагуу зөв хэрэглэсэн. Тэд зөвхөн босогчдыг айлгах зорилгоор байл­дааны буунд резинэн сум хэрэглэж буудсан.

-Танд үүнийг нотлох баримт байгаа юм уу?

-Байгаа. Жишээ хэлэхэд, нийс­лэлийн Сүхбаатар дүүргийн 13 дугаар хорооны иргэн н.Сүхбаатар гэж хүн тэнэсэн резинэн суманд өртөж нэг нүдээ сохлуулсан то­хиолдол бий.

-Тэгвэл тэр үед амь алдсан таван хүнийг хэн буудсан юм бол. Мөрдөн байцаалтын явцад байлдааны сумаар буудсан нь тогтоогдсон шүү дээ. Бас тэнд цагдаа нараас өөр ямар ч байл­дааны зэвсэг ашигласан гэх баримт олдоогүй.

-Тэгвэл би цагдаа нарыг хүн буудаагүй гэдэгт 100 хувь итгэлтэй байна. Хэдийгээр тэр “Хар дэвтэр”-ийг бид ямар ч үндэслэлгүй гэж байгаа ч зарим нэг баримтыг гаргаж өгсөн.

-Ямар баримт гаргаж өгсөн гэж?

-Өнөөх хар машины талаар. Чухамдаа тэр хар машин байсан нь үнэн шүү дээ. Бүр телевизийн дуранд өртсөн байгаа.

-Нууц биш бол ямар телевизийн дуранд өртсөн юм бол?

-“UBS” телевизийн. Жагсаал болоод хоёр хоног өнгөрч байхад хэдэн цагт ч билээ дээ, хар масктай, буу барьсан хоёр хүн жижгэвтэр хар машины хажууд зогсож байгаа дүрс бий. Гэхдээ энэ дүрсийн талаар нэг ч мэдээлэл мөрдөн байцаалтын явцад дуул­даагүй. Хүн буудсан талаарх мэдээлэл хэлсэн сувилагчийн амыг барьдаг шиг хуурцгийг нь устгасан юм шиг байна лээ.

-Таны хувьд хэргийн мөрд­лөгийг хэр сайн болсон гэж бодож байна вэ?

-Сулхан болсон. Үүнд Таг­нуул, Мөрдөн байцаах газар, про­­ку­ро­рынхон аль аль нь үүр­гээ ухамсарлаж ажиллаагүй. Үүнийг бид шүүмжлэхээр огт хү­лээж авдаггүй. Бүр зарим нэгэн хүмүү­сийг хэрэгт дахин шалгах үндэслэлтэй байтал ер хэрэгсэхгүй байгаа.

-Та сая мөрдлөг хангалтгүй болсон гэлээ. Та нар цагдаа нарыг хүн будаагүйг нотлохын тулд өөрсдөө мөрдлөг хийж үзсэн үү?

-Тийм зүйл хийгээгүй. Бидэнд хэрэг мөрдөх эрх байхгүй шүү дээ.

-Ер нь үнэн, худал ч бай “Хар дэвтэр”-т тэмдэглэн бичсэн хү­нийг та тогтоох гэж оролдож үзсэн үү?

-Бага зэрэг мэдээлэл бий. Тэр дэвтрийн эзэн Эргүүл хам­гаалалтын албанд ажиллаж байсан н.Төмөрхуяг гэх нэртэй цагдаа бий гэж сон­согдсон. Түүний ээж нь хуульч хүн гэсэн мэдээл бий. Гэхдээ яг энэ нэр мөн, биш нь тодорхойгүй байгаа. Ямартай ч цаашид үнэн нь олдож таарна.

-Та нар Х.Тэмүүжин гишүүний тэр дэвтрийг  бодитоор нь харсан уу?

-Бидэнд ер үзүүлэхгүй байгаа. Тэ­гэхээр жаахан асуудалтай байгаа гэ­сэн үг биз дээ. Х.Тэмүүжин үхсэн хү­­мүүсээр түрий барьж О.Магнай, Ж.Бат­зандан, Б.Жаргалсайхан на­рыг хаацайлах гэсэн оролдлого хийж байна. Эцсийн эцэст тэд сон­гуульд ялагдсандаа болж зохион бай­гуу­лалтайгаар цуглаан хийсэн шүү дээ.