Хойд Америкийн хэрэглэгчдээс гадна дэлхий даяар 500 сая хүнийг эгнээндээ нэгтгэсэн Facebook хэрэглэгчдийнхээ хувийн нууцыг хамгаалах тал дээр анхааран арга хэмжээ авахаа мэдэгдлээ. Хэрэглэгчдээс ирсэн гомдлын дагуу гурван сарын хугацаанд шалгалт хийсний эцэст тус компани ийм алхам хийх зайлшгүй хэрэгтэй байгаагаа хүлээн зөвшөөрөв.

Ирландын Мэдээлал хамгаалах комиссоос дээрх шалгалтыг хийсэн юм. Facebook-ийн Ирланд дахь оффис Америк, Канадаас бусад орны хэрэглэгчдийг хариуцдаг ажээ. Шалгалтын мөрөөр хамгаалалтыг сайжруулах ажлыг ирэх зургаан сарын дотор хийж гүйцэтгэх юм байна. Хэрэглэгч фото зургаа өөрийн хуудсанд хуулах үеэр хөндлөнгийн хүн тэрхүү зургийг олж үзэх боломжтой гэдгийг сануулах, аливаа мэдээллийг хэрэглэгч өөрийн хуудаснаасаа маш хялбархан устгах боломжтой болох зэрэг ажлуудыг хийх гэнэ. Энэ ажлаа тайлагнасан албан ёсны мэдээллийг ирэх долдугаар сард олон нийтэд цацна. Өнгөрсөн сард Facebook-ийг үүсгэн байгуулагч Марк Зюкерберг хэрэглэгчийн хувийн нууцыг хадгалах тал дээр нэлээд алдаа гаргаснаа хүлээн зөвшөөрч мэдэгдсэн билээ.