УИХ-ын Төрийн байгуулалтын байнгын хорооны хуралдаан эхэлсэн цагаасаа маргаан дагууллаа. Уг хурлаар гишүүн Н.Батбаяр, Д.Энхбат, Д.Дамба-Очир нарын зэрэг гишүдийн санаачилсан Монгол Улсын Үндсэн хуулийн хорин есдүгээр зүйлийн нэг дэх хэсэгт нэмэлт оруулах тухай, Монгол Улсын Үндсэн хуулийн жардугаар зүйлийн 2, 3 дахь хэсэгт өөрчлөлт оруулах тухай хуулийн төсөл, Зарим хотуудад улсын зэрэглэл тогтоох тухай тогтоолын төслийг хэлэлцэх эсэх, Засгийн газрын агентлагийн эрх зүйн байдлын тухай хуульд нэмэлт оруулах тухай хуулийн төслийн анхны хэлэлцүүлгийг хийх, Нийслэлийн эрх зүйн байдлын тухай хуулийн /Шинэчилсэн найруулга/ төсөл, Нийслэлийн эрх зүйн байдлын тухай хуулийг хүчингүй болсонд тооцох тухай, Монгол Улсын нэгдсэн төсвийн тухай хуульд нэмэлт, өөрчлөлт оруулах тухай, Татварын ерөнхий хуульд нэмэлт, өөрчлөлт оруулах тухай, Барилгын тухай хуульд нэмэлт оруулах тухай, Тусгай хамгаалалттай газар нутгийн тухай хуульд өөрчлөлт оруулах тухай хуулийн төслүүдийн  анхны хэлэлцүүлэг, Нийтээр тэмдэглэх баяр ёслол, Үндэсний их баяр наадмын тухай хуульд нэмэлт, өөрчлөлт оруулах тухай зэрэг хуулийн төслийг хэлэлцсэн юм.

Үндсэн хуульд өөрчлөлт оруулах тухай хуулийн хотуудын статусыг сэргээх, сумдын Засаг дарга нарыг иргэдээс сонгох зэрэг асуудал мэтгэлцээн дагуулсан бол Н.Батбаяр нарын гишүүдийн санаачилсан Нийтээр тэмдэглэх баяр ёслол, Үндэсний их баяр наадмын тухай хуульд нэмэлт, өөрчлөлт оруулах тухай зэрэг хуулийн төсөл бүр ч их маргаан дэгдээв. Төсөл Монгол Улс Манжийн 220 жилийн дарлалаас чөлөөлөгдөж тусгаар тогтнолоо сэргээсний 100 жилийн ойг бүх нийтийн амралтын өдөр болгох, цаашдаа арванхоёрдугаар сарын 29-нд бүх нийтээрээ амарч байх, тусгаар тогтнолын 100 жилийн ойг онцлон бөхчүүдэд улсын цол олгох зэрэг агуулгыг багтаажээ.

Төрийн байгуулалтын байнгын хороонд харьяалагддаг МАН-ын бүлгийн гишүүд уг асуудлыг хэлэлцэх үед гарч явсан нь бүр ч гал дээр тос нэмж, Монголын тусгаар тогтнолыг МАН-ын бүлгийнхэн дэмжихгүй байна уу гэх зэрэг үгийг АН-ын бүлгийнхэн чулуудлаа. 100 жилийн ойгоор бөхчүүдэд улсын цол олгох асуудлыг эрхэм гишүүн, үндэсний бөхийн дархан аварга Б.Бат-Эрдэнэ болон Бөхийн холбооныхон дэмжихгүй байсан юм. Гэвч Н.Батбаяр нарын гишүүд онцгой тохиолдол тул цол олгох ёстой хэмээн маргалдсаар санал хураасан ч дэмжлэг авсангүй. Гэвч ирц гүйцсэн хойно дахин хэлэлцэхээр болж байнгын хорооны хуралдааныг 16.00 цаг хүртэл завсарлууллаа.