Хүүхэлдэйн театр бэлгээ задаллаа

Монгол Улсын Хүүхэлдэйн театр энэ шинэ жилийн баяраар хүүхэд багачуудад зориулж хоёр томоохон уран бүтээл тавихаар болжээ. Гэхдээ 1-5 нас буюу цэцэрлэгийн багачуудад “Хөгжилтэй шинэ жил” тоглолтыг, сургуулийн насны хүүхэд багачуудад “Хүслээр ирдэг шинэ жил-2 буюу 12 сар” үлгэрийн жүжгийг сонирхуулах гэнэ. Уг жүжгийг С.Маршакийн “Арванхоёрдугаар сар” зохиолоор сэдэвлэсэн бөгөөд хойд эхийн хахир хатуу зан охинд хэрхэн туссан тэр охины хүслийг ах дүү Арвахоёрдугаар сар хэрхэн биелүүлж байгааг өгүүлдэг бөгөөд биднийг жаахан байхад ч уг зохиолоор үлгэрийн кино хийж олны хүртээл болж байсан зохиол юм. Харин “Хөгжилтэй шинэ жил” тоглолтод хүүхэд бүхний үзэх хамгийн дуртай хүүхэлдэйн киноны баатрууд авьяас билэг ид хаваа гайхуулж үзэгч хүүхдүүдтэйгээ дуулж, бүжиглэх гэнэ шүү.

Тоглолт энэ сарын 28, 29-нд Хүүхэлдэйн театрт болох бөгөөд бэлэгтэй тасалбар нь 6000 төгрөг, бэлэггүй тасалбар нь 2500 төгрөг гэнэ.