Монголын чөлөөт бөхийн холбоо шинэ жилийн баяраа тэмдэглэлээ. Шинэ жилийн баярыг нээж МБЧХ-ны ерөнхийлөгч Л.Чинбат үг хэлэхдээ “Өнгөрч байгаа 2011 онд манай улсад чөлөөт бөхийн спорт үүсч хөгжсөний 50 жилийн ойгоо тэмдэглэж бүтэн жилийн турш цуврал арга хэмжээ зохиолоо. Манай эмэгтэй чөлөөт бөхийн баг ДАШТ-нээс гурван медаль авч багаараа гуравдугаар байр эзэлж түүхэн гавьяа байгууллаа. Ирж байгаа 2012 онд одоо өвөртлөөд байгаа олимпийн хоёр эрх дээрээ дахин нижгээд эрх нэмж, Лондонгийн зуны олимпийн наадамд аль болох олон бөх оролцуулж лавтай медаль авах том зорилго байна. Он гараад болох “Mongolian Open 2012” олон улсын тэмцээнийг амжилттай явуулахын төлөө бүгдээ мэрийцгээе” хэмээн онцлон тэмдэглэлээ. Шинэ жилийн баярын үеэр Олон улсын бөхийн төрлүүдийн нэгдсэн холбоо “ФИЛА”-ны “Мөнгөн одон”-гоор МЧБХ-ны дэд ерөнхийлөгч, “Хасу-Мегаватт” компанийн захирал Ж.Түмэн-Аюуш, “Хүрэл одон”-гоор Уулын баяжуулах “Эрдэнэт” үйлдвэрийн Бээжин дэх төлөөлөгчийн газрын дарга Д.Болдбаатар нар шагнуулсныг гардуулсан юм.
 
Шинэ жилийн ёслолд БТСГ-ын дарга Ч.Наранбаатар оролцож, баяр хүргэсэн. Тэрчлэн МҮОХ-ны дэд ерөнхийлөгч Ц.Дамдин оролцож, МЧБХ-ны дэд ерөнхийлөгч, “Эрдэнэбулган” ХХК-ийн захирал Б.Баттүвшин, МЧБХ-ны дэд ерөнхийлөгч, “Женерал элементэс” компанийн захирал А.Баянмөнх, МЧБХ-ны дэд ерөнхийлөгч, “Шарын гол” ХК-ийн Төлөөлөн удирдах зөвлөлийн дарга Б.Батмөнх, МЧБХ-ны дэд ерөнхийлөгч, “B and J” группийн ерөнхийлөгч Д.Батмөнх, Төв аймгийн спорт хорооны дасгалжуулагч Лувсандамбын Энхбаяр нарт МҮОХ-ны “Алтан медаль” гардуулав.

Өнгөрч байгаа онд ДАШТ-нээс медаль хүртсэн олон улсын хэмжээний мастер Д.Отгонцэцэг, О.Насанбурмаа, Б.Оюунсүрэн, залуучуудын ДАШТ-нээс хүрэл медаль хүртсэн Б.Батцэцэг, өсвөр үеийн ДАШТ-нээс медаль хүртсэн Ц.Намуунцэцэг, С.Цэрэнчимэд зэрэг өндөр амжилт гаргасан зарим тамирчид, дасгалжуулагч Ц.Баярсайхан, З.Дүвчин, Т.Сүхбаатар нарт МБЧХ-оос мөнгөн урамшуулал хүртээв.

Чөлөөт насанд хүрэгчид болон залуучуудын эмэгтэй шигшээ багийн тамирчид цэнгээнт бүжиг хийсэн нь ёслолд оролцогчдын талархлыг хүлээж байлаа.