За, хаа саагүй оны шилдгүүд тодроод эхэллээ. Эх оронч УИХ-ын гишүүдээс эхлээд оны шилдэг жаалыг хүртэл тодруулах арга хэмжээ шил шилээ даран зохиогдсоор байна. Мөн цааш нь улаан хивс, цагаан хивс, ногоон хивсний ёслол гэж үргэлжлээд л. Ингээд бодоод байсан чинь би ч гэсэн оны шилдгүүдээ тодруулмаар санагдчихлаа. Шагнал өгч чадахгүй ч “Шархүү Авардс”-д түрүүлсэн гэгдэх алдраа хаана ч ашиглах эрхийг нь өглөө шүү, та нарт.     Уг нь улс төртэй холбоотой нөхдийг оруулахгүй гэж тооцож байсан ч тэдний оролцоогүй юм гэж алга. Ингэхээр яая гэх вэ,

“Оны басч байгаад хөлөө авахуул­сан хүн”-ээр МАХН нэрээ хуучин даргадаа алдсан С.Батболд, Монголын Ногоон нам нэрээ алдсан Д.Энхбат нар хамтдаа шалгарч байна.

“Оны суга татуулсан хүн”-ээр Английн шоронгоос Авлигатай тэмцэх газрын дэд дарга хүртлээ татуул­сан Б.Хурц өрсөлдөгчгүйгээр тодор­лоо. Зүгээр ч нэг татуулалгүй Ерөнхийлөгчтэй хамт онгоцоор баяр ёслолын байдалтайгаар ирсэн нь шалгаруулалтад оноо цуглуулахад нь нөлөөлсөн байна.

"Time" сэтгүүл мань хоёрын нэг шалгаруулалтын үр дүн их төстэй гарчээ. "Time" оны онцлох хүнээр “арабын жагсагчид”-ийг тодруулсан бол Шархүү авардс “Оны хүн”-ээр Хүний хөгжил сангийн мөнгөө авахаар дугаарлаж буй энгийн иргэдийг тодрууллаа. 

“Оны азгүй дамшиг” номинацид АТГ-ын дарга Ч.Сангарагчаа, Архангай аймгийн цагаан зээр хоёр өрсөлдөв. Энэ жил малын газрын гарц сайн байсантай холбоотойгоор хүзүүндээ байрлуулсан дохио дамжуу­лагч зүүлтэндээ боогдон үхсэн зээр маань огцорсон даргад цөөн саналаар ялагдав.

“Оны үг” номинацид хэд хэдэн хүчтэй өрсөлдөгч байлаа. “Хүний хөгжил”, ”Тавантолгойн хувьцаа”, “Долдугаар сарын 1” гээд хүчтэй өрсөлдөгчдөөс “сонгууль” түрүүлэв. 

Харин нийгмийн асуудал хөнд­сөн, сэтгэлгээний ядуурлын сэдэвт шилдэг нэвтрүүлгээр “АХА”, “Саятан болохыг хүсвэл” нэвтрүүлгүүд ойрол­цоо оноотойгоор тэргүүлжээ. Уг нэвт­рүүлгийн зочин Номингоос “Нэг жил хэд хоногтой вэ” гэж асуухад,

-Би ойрд ном уншаагүй л дээ гэх хариулт, Үсээ гельдсэн магистр залуугаас “Усан доогуур хорин мянга бээр аялсан нь зохиолыг уншсан уу” гэхэд

-Аан, Дисковери чайнел дээр гарч байсан Ю-317  нэвтрүүлгийг асуугаад байгаа юм уу” гэх мэдэмхийрлүүд нэлээдгүй оноог цуглуулав.  

“Оны хулхидуулсан толгой” номи­нацад Тавантолгойн хувьцаагаа, амлал­тын сая таван зууг хамтад нь авна гэж тооцоолж байсан 2,7 сая хүн хамтдаа шалгарлаа. Анхнаасаа хоёр өөр зүйл ярьж байгаад адаг сүүлд нь нэг болгоод өгөхөөр болсныг нь “Яах вэ нэгийг нь ч гэсэн өгч байвал” гээд баярлаад л авахаар болов.

“Хүлээсэн учрал” номинацад Хөгжлийн банк шууд тодров. Хөрөнгө оруулалт энэ банкнаас хийгдэнэ гэж олон төсөл хөтөлбөрийг багагүй хугацаанд хүлээлгэсэн нь энэхүү шаг­на­лыг авахад хүр­гэв. Зуун мян­­ган айлын орон сууц, Шинэ бүтээн бай­гуулалт хөтөл­бөрүүд араас нь удаалав.

“Оны төлөвлөгөө” шал­­­га­руулалтад иргэний хөдөл­­гөөнийхөн морьтой жагсаалын үеэр хийгдсэн “Барын базалт” нэртэй ажил­лагаа нэрээрээ түрий барьж нэлээд урдуур жагссан боловч Сэт­гүүлчдийн нэгдсэн эв­лэлийн их хур­­лын хашир бур­­­хи­­нуудын хий­­сэн “залхаах так­­тик” үнэхээр ам­жилт­тай хэрэгжсэн тул яахын аргагүй нэгт оров.

“Оны төрийн ивээлд багтагсад”-аар оюутнууд шал­гарлаа. Үнэгүй автобусаар явж, тэтгэлэг аваад, төлбөрөө даалгах болсон зэрэг нь гол оноонуудыг цуглуулав. Үдийн хоол хөтөлбөрөөрөө бацаанууд, тэтгэврийн мөнгөөрөө ахмадууд өрсөлдсөн ч хаана нь ч бараадсангүй.

Эцэст нь “Оны асуудал” номинацад замын түгжрэл, хотын утаа нарын аль нэг нь түрүүлэх байсан боловч Иргэдийн төлөөлөгчдийн хурлын төлөөлөгч, ирэх сонгуульд нэр дэвшихээр төлөвлөж буй Э.Түгжил энэ төрөлд хол тасархай шалгарлаа. Үнэнийг хэлэхэд иргэн Э.Түгжил  ямар ч хамаагүй номинацад намайг оруулчих гээд мөнгөө төлчих­сөн тул энэ байдлаар шийдсэн болно. Эртхэн мөнгөө өгвөл хэнийг ч хамаагүй ирэх жилийн авардсадаа урдуур “чихнэ” шүү.