Сонирхогчийн хөлбөмбөгийн хамгийн өндөр шагналын сантай Delta League-2011 футзалын тэмцээн нэг сарын турш үргэлжилж, дүнгээ гаргалаа. Нийт 15 баг хоёр хэсэгт хуваагдаж, эзэн, зочны дүрмээр тоглосон юм. Нэг баг 14 тоглолт хийж, хэсгээс шалгарсан учраас өрсөлдөөн дүүрэн байв. Хэсгийн тоглолтоос тэмцээнийг тэргүүлж байсан “Номадс” баг аваргын төлөө “Андрос”-ыг буулган авч, алтан медаль, цом, хоёр сая төгрөгийн эзэн болсон бол “Андрос” мөнгөн медаль 1.5 сая төгрөг гардлаа. Харин хүрэл медалийн төлөө “Лова”, “Western” багууд тоглож, “Лова” өрсөлдөгчөө хожсоноор хүрэл медаль, нэг сая төгрөгийн шагнал хүртэв.

Тэмцээний шилдэг тоглогчоор “Номадс” багийн Тэмүүжин, шилдэг довтлогчоор 27 гоолтой “Андрос”-ын Марк Кубан, шилдэг хаалгачаар “Лова” багийн Алтангэрэл нар шалгарлаа. Шилдэг тоглогчид мөн л Монголын хөлбөмбөгийн хувийн хамгийн өндөр шагнал болох 100 мянган төгрөгийн эзэн болсон. Тэмцээний онцлог гэвэл оролцсон баг бүрт дурсгалын зураг, бөмбөг гардуулан өгсөн. “Дельта авто сервис” компани өмнөх том талбайн тэмцээний аварга багийг гурван сая төгрөгөөр урамшуулж байлаа.