Тайландын  Гадаад хэр­гийн яам экс ерөнхий сайд Таксин Чинаватын хураагдсан паспортын оронд шинэ паспорт олгосноор тэр эх орондоо ирэх боломжтой болж байна. Гадаад хэргийн сайд Сурапонг Тохвичакчайкулын (Surapong Tohvichakchaikul)  хэлснээр Таксин Чинават тус орны аюулгүй байдалд хор хөнөөлгүй гээд түүнийг Арабын Нэгдсэн Эмиратаас эх орондоо ирж болно гэсэн байв.

Эрүүгийн мөрдөн байцаалтаас зугтан эх орноо орхисон Таксин Чинават буцан ирэх боломжтой болж байгаа нь өнгөрсөн наймдугаар сард  ерөнхий сайдаар сонгогдсон түүний дүү охин Йинглак Чинаватын буян гэлтэй. Түүний толгойлсон “Пхыа Тхаи” нам ахыг нь огцруулснаас хойших хууль журмуудыг аажмаар либералчилж байна. Мөн Чинаватын талынхныг терроризмын хэргээр шоронд хорьсныг удалгүй өршөөлөөр суллах бололтой.