МҮБХ-ноос тав дахь жилдээ зохион байгуулж буй “Дөрвөн уулын хишиг” барилдаан тэгш тоотой саруудад болдог билээ. Монгол бөхийн түүхэн дэх уул тайлгын буюу арван засгийн наадмыг орлох цуврал барилдааны нэг Баянзүрх хайрханы хишиг барилдаан өчигдөр /2011-12-18/  Монгол бөхийн өргөөнөө боллоо. Цагаан сарын барилдаантай дүйцэх эл барилдаанд улс, аймгийн алдар цолтой хүчит 256 бөх зодоглодгоороо онцлогтой юм. Барилдаанд улсын арслан Д.Ганхуяг, Х.Мөнхбаатар, Г.Эрхэмбаяр, улсын гарьд Н.Ганбаатар, Ж.Бат-Эрдэнэ, улсын заан Ц.Мягмарсүрэн, М.Өсөхбаяр, Б.Соронзонболд, улсын харцага Д.Батболд, Ц.Содномдорж, Ө.Даваабаатар нарын тэргүүтэй бөхчүүд зодоглосноос Сэлэнгэ аймгийн Мандал сумын харьяат, “Сүлд” спорт хороо, “Таванхан” дэвжээ, “Ноёд” группийн бөх, улсын арслан Г.Эрхэмбаяр түрүүлж, Увс аймгийн Улаангом сумын харьяат, “Увс нуур” дэвжээ, БХИС, “Монгол керамик” ХХК-ийн бөх, улсын харцага Ө.Бат-Орших үзүүрлэв. Шөвгийн дөрөвт Өвөрхангай аймгийн Тарагт сумын харьяат улсын начин Б.Сангисүрэн, Өмнөговь аймгийн Ханхонгор сумын харьяат улсын начин Ц.Одбаяр нар шалгарлаа.

Барилдааны үеэр “Бридж” группээс харьяа бөх, даян аварга Г.Өсөхбаярт хүндэтгэл үзүүлсэн бол Г.Өсөхбаяр аварга “Бридж” группт 2009 оны улсын наадамд түрүүлэхдээ шагнуулсан алтан медалиа, мөн 1999 онд Узбекситан улсад оролцож авсан цомоо дурсгав. Түүнчлэн “Бридж” группээс дархан аварга Д.Цэрэнтогтох, Б.Бат-Эрдэнэ, Г.Өсөхбаяр нарын аваргуудад хүндэтгэл үзүүлж, гарын бэлэг гардуулсан юм.