Холливудын домогт од, хамгийн сэтгэл татам бүсгүй Мерилин Монрогийн хуримын бөгж Лос Анжелес хотод болсон дуудлага худалдаагаар 516,5 мянган ам.доллар хүрчээ. “Profiles in History” байгууллага энэ дуудлага худалдааг зохион байгуулсан аж. Энэ бөгж нэг доржпалам шигтгээ нь унасан байхдаа Нью Йоркийн Christie"s дуудлага худалдааны байгууллагад 1999 онд 772,5 мянган ам доллараар зарагдаж байжээ.

35 ширхэг доржпалам шигтгээтэй цагаан алтан энэ бөгжийг Америкийн алдарт бейсбол тоглогч Жо Ди Мажио 1954 оны нэгдүгээр сарын 14-нд гэрлэлтээ бүртгүүлэхдээ өгсөн. Харамсалтай нь гэрлэлт есөн сар үргэлжилсэн ажээ.

Хожим нь тэд эвлэрэхээр шийдэцгээж байсан боловч жүжигчин бүсгүй золгүй байдлаар амиа алдсан юм. Ди Мажио 20 жилийн турш Мерилин Монрог оршуулсан бунханд долоо хоногт гурван сарнай цэцгийн баглаа илгээдэг байсан юм. Түүнчлэн тэрээр даруухан зантай хүн байсан учир жүжигчин бүсгүй тэр хоёрын хооронд болсон түүхийг нууцлан хадгалж чадсан байна.