Засгийн газраас монгол үндэсний урлагийг дэмжихэд чиглэсэн нэгэн шийдвэрийг гаргалаа. Энэ нь “Монгол тууль” хөтөлбөр хэрэгжүүлэх ажил бөгөөд хөтөлбөрийг хэрэгжүүлэх арга хэмжээний төлөвлөгөө боловсруулан баталж, гүйцэтгэлд нь хяналт тавьж ажиллахыг Боловсрол, соёл, шинжлэх ухааны сайдад Засгийн газрын өчигдрийн хуралдаанаас даалгалаа.

Манай улсад 60 шахам туульч, 200 гаруй тууль байсан бол өдгөө Увс, Ховд аймаг, Улаанбаатар хотод ердөө 17 туульч амьд сэрүүн байна. Тэдний 4 нь 5 туулийг бараг бүрэн хэмжээнд, бусад нь хэсэгчлэн хайлдаг нь энэ урлаг устаж мөхөхөд хүрсэн гэсэн үг юм. Тиймээс “Монгол тууль” хөтөлбөрийг санаачлан хэрэгжүүлэх болсон байна.