Энэ сарын 6-ны өдрийн 14:40-17:40 цагийн хооронд ерөнхийлөгч асан Н.Энхбаярын туслах Б.Тулгыг “Хууль хяналтын байгууллагынхан хэлмэгдүүлж баривчилсан, ул­маар чөлөөлөх”-ийг шаардаж нийс­лэлийн МАХН-ын гишүүд дэмжигчид, улс төрийн зарим нам, хөдөлгөөний төлөөллөөс бүрдсэн 140 гаруй хүний жагсаал болсон. Гэвч одоо Б.Тулга суллагдаад байгаа. Харин өчигдөр 12:30-13:35 цагийн хооронд нийслэлийн Прокурорын газрын үүдэнд тэд дахин жагсав. Тэдний ийн ирсэн учир нь Б.Тулгын хэргийг хянаж байгаа хяналтын прокурор О.Мөнх­баатар “Жагсагчдыг хууль бус үйлдэл хийсэн, миний биед гэмтэл учруулсан”  зэрэг шалтгаанаар нийслэлийн Чингэлтэй дүүргийн Цагдаагийн хэлтэст шалгуулж эхэл­жээ. Бид мэдээллийн дагуу нийслэлийн Проку­рорын газар 13:00 цагийн үед очиход цагаан хоолой барьсан тав, зургаан төлөөлөл байв. Тэднээс өнөөдөр ир­­сэн учрыг нь асуухад “Өнөө­дөр бидний 40 орчим төлөөлөл ирээд бай­на. Ард түмнийхээ төлөө ажиллах ёстой, хууль сахиулах үүрэг­тэй, эх орныхоо өмнө тангараг өргөсөн цагдаа, хууль хяналтын байгууллагуудыг иргэ­дийн­хээ төлөө шударга ажиллахыг уриалж бай­на. Бас О.Мөнхбаатар прокурор ор үндэсгүй дээд газартаа мэдэгдэл гаргасныг бид эсэргүүцэж байна. Мөн Чингэлтэй дүүргийн Цагдаагийн хэлтсээс өргөдлөө тата­хыг шаардаж байна” гэлээ. Хоёр хоногийн өмнө “Н.Энхбаярын хүү Э.Батшугарыг саатуулаад байгаа” гэ­сэн мэдээлэл гарсан. Харин бид энэ талаар МАХН-ын дарга Н.Энх­баяраас тодруулахад “Тийм зүйл болоогүй, хүү маань ажилдаа явж байгаа” хэмээсэн юм.