Багш нар өөрсдийн сүр хүчээ нийгэмд мэдрүүлэх шиг болж байна. Ирэх оны төсвөөс үүдсэн багш нарын хугацаагүй ажил хаялт эрчээ авч эхэллээ. Уг нь уржигдар орой 18 цагийн үед Ерөнхий сайд С.Батболд өрөөндөө Боловсрол, соёл, шинжэх ухааны сайд Ё.Отгонбаяр, Нийгмийн хамгаалал, хөдөлмөрийн сайд Т.Ган­ди болон Монголын боловсрол, соёл, шинжлэх ухааны үйлдвэрчний эвлэлийн холбооны тэргүүн Ж.Бат­зориг, багш нарын төлөөлөл бү­хий хүмүүстэй хэ­лэлцээрийн ши­рээнд суусан. Гэвч Монголын бо­ловс­рол, соёл, шинжлэх ухааны үйлд­вэрчний эвлэлийн холбооны тэр­гүүн Ж.Батзориг “Хэлэлцээр хийж эхлээгүй. Бид асуудлаа шийдтэл ажил хаялтыг зогсоохгүй” гэсэн байр суу­риндаа бат зогсоно гэдгээ хэлсэн. Багш нарын зүгээс өчигдөр өг­лөөний байдлаар хугацаагүй ажил хаялтаа үргэлжлүүлж бай­гаа тухай мэдэгдсэн билээ. Харин энэ ажил хаялтын үр дүнд хүүхдүүд хохирч үлдэж байна. Үүний хариуцлагыг хэн хү­лээх нь мөн л ойлгомжгүй. УИХ дахь Нийг­мийн бодлого, боловсрол, соёл шинжлэх ухааны байнгын хорооны хурлын шийдвэрээр багш нарын асуудалтай танилцах ажлын хэсгийг байгуулсан. Энэхүү ажлын хэсэгт УИХ-ын гишүүн П.Алтангэрэл, С.Эр­дэнэ, Д.Кёкүшюзан Батбаяр, Д.Ар­вин, Д.Одбаяр нар багтсан аж. Тэд өчигдрөөс эхлэн хугацаагүй ажил хаялт зарласан багш нарын тө­лөөлөлтэй болон бусад холбогдох албаны хүмүүстэй уулзсан.  Өчигдөр 12 цагийн үед Боловсрол, соёл, шинж­лэх ухааны үйлдвэрчний эвлэлийн холбооны ажил хаялт зохион байгуулах түр хорооны гишүүд  Нийгмийн хамгаалал, хөдөлмөрийн сайд Т.Гандитай уулзсан боловч тодорхой шийдвэрт хүрээгүй. Тий­мээс “Ажил хаялтаа зогсоох та­лаар ярих болоогүй” гэдгийг түр хорооныхон онцолж байлаа. Харин 14.30 цагийн үед МҮЭСТО-д нэгдсэн уулзалт хурал зохион байгуулсан. Улмаар 15.30 цагийн үед ажил хаяж байгаа багш нарын төлөөлөл Ерөнхий сайдад шаардлага гардуулсан юм. Шаардлагын гол санаа нь  “Цалин тэтгэмжийг ирэх оны нэгдүгээр сарын 1-нээс эхлэн нэмэх”  талаар өгүүлсэн байжээ.

Орон нутгийн хувьд Дархан-Уул, Архангай аймгийн Тариат сум, Ховд аймгийн Булган сумын багш нар ажил хаялтад нэгдсэн гэдгээ албан ёсоор мэдэгдсэн бол Увс, Өвөрхангай, Ховд, Баян-Өлгий, Орхон, Дорнод зэрэг аймгийн ерөнхий боловсролын сургуулийн багш нар тус түр хо­рооныхонтой утсаар холбогдон, ажил хаялтыг дэмжиж буйгаа илэр­хийлээд “нэгдэхэд бэлэн” гэдгээ дамжуулжээ.

Ерөнхий сайд С.Батболд “Улс орны хөгжилтэй холбоотой, нийг­мийн тэр дундаа боловсролын олон асуудал Засгийн газрын хурал­даа­­нуудаар орж, амжилттай ший­дэгдэж байгаа. Эдгээр дотор сайнаар шийдвэрлэгдэж байгаа олон асуудал бий. Гэхдээ шийдвэрлэбэл зохих, шийдвэр нь хүлээгдэж байгаа, төр засгийн зүгээс анхаарал тавих ёстой асуудлууд бий гэдгийг ойлгож бай­гаа. Эдгээрийг үе шаттайгаар, сис­темтэйгээр шийдвэрлэж байгаа. Тэр дотор багш нартай холбоотойгоор салбарын үйлдвэрчний эвлэлийн бай­гууллага нь төр, засагтаа хандаж, тэдгээрийн сонирхол, бодол саналыг илэрхийлж, асуудлыг тавьж байна гэж ойлгож байна. Энэ агуулгаараа та бүхнийг хүлээн авч, сонсъё гэсэн юм” хэмээн боловсрол, соёл, шинжлэх ухааны үйлдвэрчний эвлэлийн хол­­бооны ажил хаялт зохион бай­гуу­лах түр хорооны гишүүдийн байр суурийг сонирхсон ч “дахин ху­ралдах хэрэгтэй” хэмээн уулзалт өндөрлөсөн удаатай. Багш нарын төлөөлөл МҮЭСТО-ны хурлын их танхимд “Багш нарын хугацаагүй ажил хаялтыг үргэлжлүүлэх нь зүйтэй” гэсэн байр суурийг ихэнх сургуулийн төлөөлөл болон багш нар мэдэгдэж байсан юм.

Харин өчигдөр уг ажил хаял­тад Эрүүл мэнд, урлаг, хүчний бай­гууллагынхан нэгдэхээ мэдэгдсэн юм. Тодруулбал, ажил хаялтад эрүүл мэндийн салбар, хүчний бай­гууллагынхан буюу цагдаа, онц­гой байдлын ажилчид, урлагийн байгууллагынхан нэгдэхээр болсон аж. Хугацаагүй ажил хаялт багш нараас эхлээд салбар салбарыхныг хамруулан энэ мэт үргэлжлэх юм бол асуудал улсын хэмжээнд өрнөж ноцтой болж хувирах та­лаар Монголын Үйлд­вэрчний эвлэ­лийн ерөнхийлөгч С.Ганбаатар сэ­рэмж­лүүлжээ. Тэр­бээр ажил хаялтыг “Үнэндээ бид нэг хүн, бай­гууллагын эрх ашгийн төлөө дуу хоолойгоо нэгтгээгүй. Өөрөөр хэл­бэл, “Нэг үхрийн эвэр доргиход мян­ган үхрийн эвэр дор­гидог” гэ­дэг­тэй адил. Одоогийн байд­лаар нийгэмд боловсрол, эрүүл мэн­дийн салбарынхан нэгдэж, ажил хаялтад оролцоход бэлэн гэдгээ ан­хаа­руулаад байгаа. Өнгөцхөн харахад хоёр л байгууллага тэмцээд байгаа мэт боловч энэ бүхэн нийгмийн сайн сайхны төлөө арга хэмжээ юм. Боловсрол, эрүүл мэнд, соёл урлагийн байгууллага, хувийн хэвшлийнхэн энгийн иргэдийн дуу хоо­лойг төр, засагт хүргэх зорилготой. Түүнээс биш бид мөнгөний төлөө энэ тэмцлийг хийгээгүй. Нийгэмд бугшсан баян, хоосны ялгааг үгүй хийж, тендер нэрээр тэрбумтан бологсдын үйлдлийг таслан зогсоож, эрүүлжүүлэх зорилготой” хэмээн дүгнэж байна.    

Өчигдөр боловсролын шинэчлэл, шинэ стандарттай уялдуулан бо­ловс­ролын салбарт ажиллагсдын мэр­гэж­лийг дээшлүүлэх, багшийн мэр­гэжлийн нэр хүндийг өргөж, нийг­мийн асуудлыг шийдвэрлэх, сургалт, давтан сургалтын тогтолцоог боловс­ронгуй болгох зохицуулалтыг хийх, Боловсролын тухай хуульд нэмэлт, өөрчлөлт оруулах тухай асуудал Засгийн газрын түвшинд яригдсан. Үүний хүрээнд УИХ-ын гишүүн Д.Оюунхорол, Ө.Энхтүвшин, Д.Очир­бат, Д.Одбаяр, С.Эрдэнэ, П.Алтан­гэрэл нарын боловсруулсан хуу­лийн төслийг Монгол Улсын Ерөн­хий сайд С.Батболдод өчигдөр өргөн барьсан юм. Энэхүү төсөлд Боловсролын байгууллагад ажил­лагсдыг таван жилд нэг удаа эрүүл мэндийн урьдчилан сэргийлэх үз­лэг, шинжилгээнд үнэ төлбөргүй хам­руулах, ерөнхий боловсролын сур­гууль, цэцэрлэгийн багш, удирдах албан тушаалтны мэргэшлийг улсын төсвийн хөрөнгөөр таван жил тутам дээшлүүлэхээр хуулийн тө­сөлд онцгойлон тусгасан аж. Мөн бүх шатны сургууль, цэцэрлэгийн багш болон одоо мөрдөгдөж байгаа Боловсролын тухай хуульд заасан албан тушаалд 25 ба түүнээс дээш жил ажилласан иргэнд тэтгэвэрт га­рахад нь 24 сар, үүнээс сум, тосгон, багийн сургууль, цэцэрлэгт 10 жил ажилласан ба түүнээс дээш ажилласан бол 36 сарын үндсэн цалинтай тэнцэх хэмжээний тэтгэмжийг нэг удаа ажил­лаж байгаа байгууллагаасаа авах эрхийг тусгаснаар төрийн албан хаагчдын тэтгэмжийн ялгавартай байдлыг арилгана гэдэгт хууль са­наачлагчид найдаж байгаагаа улам­­жилжээ. Уг нь багш хуулинд “Хөдөлмөр эрхлэгчид ямарваа нэ­гэн асуудлаас болж ажил хаясан тохиолдолд хэлэлцээрийн ширээний ард суусан бол шууд ажил хаялт зогсож, хэвийн байдал руу шилжих ёстой” гэх утгатай заалт байдаг аж. Гэвч хугацаагүй ажил хаясан багш нар өчигдрийн хуралдаанаар “Ажил хаялтаа үргэлжлүүлэх болно” хэмээн мэдэгдсэн юм. Ямартай ч бусад салбарынхан руу хүчтэй нөлөөлж буй ажил хаялт хэдий хэр хугацаанд үргэлжлэх нь тодорхойгүй хэвээр үлдлээ. Хэрэв асуудал нааштайгаар эргэвэл ирэх даваа гарагаас хичээл орж  ажил хаялт зогсож магадгүй талаар ажил хаялтын түр хорооны зарим гишүүд мэдэгдсэн билээ.