“Глоб Интернэйшнл” төрийн бус байгууллага Азийн сангийн дэмжлэгтэйгээр “УИХ-ын 2012 оны сонгуульд нэр дэвших эмэгтэйчүүдийг дэмжих нь” нэртэй төсөл хэрэгжүүлж байгаа. Төслийг энэ оны есдүгээр сард эхлүүлсэн бөгөөд ирэх оны хоёрдугаар сарыг дуустал үргэлжлэх юм байна. Тиймээс ч энэ хугацаанд хэвлэл мэдээллийн хэрэгслүүд эмэгтэй нэр дэвшигчидтэй хэрхэн хамтарч ажилладаг, тэдний талаар материал нийтэлснийхээ төлөө хэдэн төгрөг авдаг, мэдээ, мэдээлэлд нь хэр зэрэг зай талбай зориулдаг, ямар агуулгатай мэдээлэл нийтэлдэг зэргийг тодорхойлох зэргийг судалж буй аж. 

Тэгвэл өнгөрсөн даваа гарагт “Глоб Интернэйшнл” тө­рийн бус байгууллагынхан сэт­гүүлч­дийг “УИХ-ын 2012 оны сон­гуульд нэр дэвших эмэгтэйчүүдийг дэмжих нь” сургалтад хамруулсан юм. Сургалт хоёр өдөр үргэлжилж өчиг­дөр дууссан. Энэ үеэр эмэгтэйчүүдийн сонгуульд нэр дэвших, сонсогдох эрхийн та­лаар ярилцсан. Мөн УИХ, улс төр дэхь эмэгтэйчүүдийн оролцоо, эмэг­тэйчүүд чухам ямар асуудлыг эрэг­­тэйчүүдээс илүү шийдвэрлэж чадах вэ гэдгийг хэлэлцэв. Эмэгтэй нэр дэвшигчид нийгмийн халамж, боловсрол, ажлын байр нэмэгдүүлэх гээд олон асуудалд шийдвэр гаргах чадвар нь эрэгтэйчүүдээс илүү ч үүнийг нь хүлээн зөвшөөрөхгүй байх тохиолдол их байгаа. Бас сонгуульд оролцох эрхийг нь эрэгтэй улс төр­чид хааж байгаа юм. Сонгуулийн тухай хуулийн шинэчилсэн найруул­гын төсөлд сонгуульд өрсөлдөх эмэгтэйчүүдийн квотыг 20 хувь байхаар зааж өгсөн. Гэхдээ сургал­тын үеэр “Глоб интернэйшнл” төрийн бус байгууллагын тэргүүн Х.Наранжаргал, “Монфемнет” үндэсний сүлжээний Ерөнхий зохи­цуулагч Т.Ундаръяа “Эмэгтэйчүү­дийн квот гэж байх ёсгүй. Сонгуульд нэр дэвших эмэгтэйчүүдийн квот 20 хувь бус 100 хувь байх ч боломжтой” гэж байлаа. Харин квот тогтоож байгаа нь Монгол Улсад, улс төрт жендерийн тэгш бус байдал түгээмэл байгааг харуулж байгаагийн нэг илрэл юм. Хэвлэл мэдээллийн хэрэг­сэл, сэтгүүлчдийн дунд ч эмэгтэй нэр дэвшигч, улстөрчидтэй ийм байдлаар харьцах тохиолдол элбэг байдаг аж. Тиймээс УИХ-ын 2012 оны сонгуулийн үеэр эмэгтэй нэр дэвшигчдийн талаарх  нийтлэг ташаа ойлголтыг арилгах, иргэдэд зөв мэдээлэл өгөх нь зайлшгүй чухал байгаа ажээ. “Сант марал” төвөөс энэ талаар судалгаа хийсэн бөгөөд “Ирэх сонгуулиар танай тойрогт эмэгтэй хүн нэрээ дэвшүүлбэл дэмжих үү” гэсэн асуултад иргэдийн олонхи нь “Тийм” гэж хариулсан байна. Энэ нь иргэд эмэгтэйчүүдийг төлөөллөөрөө сонгоход бэлэн байгааг харуулж байгаа ажээ.

Сургалтад эмэгтэйчүүдэд чиглэ­сэн үйл ажиллагаа явуулдаг тө­рийн бус байгууллагынхан болон, жижиг нам, иргэний нийгмийн байгуул­лагын төлөөлөл оролцож санал бод­лоо солилцсон юм.