2011-2012 оны өвлийн улиралд зохиогдох биеийн тамирын үйл ажиллагааны нээлт “Цасны өдөрлөг” өнгөрөгч бямба гаригт “СКАЙ РЕЗОРТ” цанын баазад боллоо. Өдөрлөгийн арга хэмжээнд нийслэлийн төрийн болон төрийн бус байгууллагууд, идэвхтэй дасгал хөдөлгөөнөөр тогтмол хичээллэн алхдаг, гүйдэг, харзны усанд ордог иргэд, Үндэсний шигшээ багийн тамирчид, Монголын цана, дугуй, уулын цанын холбоод оролцсон юм. Энэ үеэр үйл ажиллагаанд оролцогчдод зориулж уулын цана, гүйлтийн цанын тамирчдын үзүүлэх тоглолт, уулын цанаар гулгаж сурах анхан шатны үнэгүй сургалт болж, хөлбөмбөг, олс таталт, хүүхдийн чарга, уулын цанын тэмцээнийг зохион байгуулжээ.