Оросын хамгийн нэр хүндтэй сэтгүүл “Ком­мерсант”-ын эрхлэгч болон ахлах редактор өчигдөр ха­лагдсан байна. Тэдний хувьд “Коммерсант Власт” сэтгүүлийн өнгөрсөн мягмар гарагийн дугаарт нүүрэнд нь Төрийн Думын сонгуулийн эсрэг тэмцэл өргөжиж байгааг илтгэсэн агуулга бүхий зурагтай гаргажээ. Түүнчлэн сонгуулийн дүнг будилаантуулахын тулд Нэгдсэн Орос нам ямар арга хэмжээ авсан тухай нарийвчилсан мэдээлэл бү­хий нийтлэл бичихээ ч март­сангүй. “Коммерсант” груп­­пийн салбар болох улс төрийн талаарх нийт­лэ­лүүдээрээ ал­дартай “Ком­мерсант Власт” сэтгүүл нь олон сая ун­шигчдад хүрдэг билээ.

В.Путин төрийн эрхийг барьж байх хугацаанд Оросын сэт­гүүл­чид түүнийг шүүмжилсэн агуул­га бүхий мэдээ, мэдээлэл бэлт­гэхийг оролдсоор ирсэн. Гэхдээ “Коммерсант”-ын сэтгүүлч шиг ийм зоригтой алхам хийсэн нь ховор юм. “Нью таймс” сэтгүүлийн ерөнхий эрхлэгч Евгений Албатс “Орост “В.Путинийг бүү оролд” гэдэг дүрэм байдаг юм” хэмээн “Wall Street Journal”-д өгсөн ярилцлагадаа дурьд­жээ. “Коммерсант Власт”-д сонгуультай хол­боо­той хэд хэдэн нийтлэл гарсан. Түүний нэгэнд нь Нэгдсэн Орос нам хүмүүсийн дэмжлэгийг авахын тулд хяналтаа чангатгаж байгаа тухай онцолсон байна.

Түүнчлэн санал хураалтын явцад ямар булхай гаргасан тухай өөр нэгэн нийтлэлдээ бичжээ. Харин тэргүүн нүүрэндээ В.Путин сонгуулийн машины урд зогсож, санал өгөх гэж байгааг харуулсан зураг гаргасан байна. Гэхдээ хар бараан өнгө давамгайлсан энэ зураг “Коммерсант Власт”-ийн энэ удаагийн дугаарын нийтлэлийн өнгө аясыг бүрэн тодорхойлж чад­жээ. “Коммерсант” хэвлэлийн груп­пын гол хувь эзэмшигч нь Оросын тэрбумтан Алишер Б.Усманов. “Фэйсбүүк”-т хүртэл хувь эзэмшдэг тэрбээр Кремлийн удирдагчидтай харилцаагаа муут­гахгүй байхыг эрмэлздэг хүн хэмээн “Wall Street Journal”-д тодорхойлсон. Тиймээс сэтгүүлийн шинэ дугаар гарсны дараа тэрбээр “Коммерсан Власт”-ийн ерөнхий эрхлэгч Максим Ковалский, “Ком­мерсант” хэвлэлийн группын ерөн­хий захирал Андрей Галиев нарыг халжээ. Түүнчлэн удахгүй өөр нэгэн орлогч захирлыг халахаар бол­сон байна. “gazeta.ru”-д өг­сөн ярилцлагадаа Б.Усманов “Эд­гээр нийтлэлийг гаргасан нь маш бүдүүлэг хэрэг болсон” гэж тайл­барласан байна. Тэр өмнө нь хэзээ ч ийм өндөр албан тушаалтай сэтгүүлчээ халж байсангүй. Харин М.Кавалский “Цаг үе хэцүү байгаа учраас Кремлийн удирдагчид маш их болгоомжилж байна. Би эндээс “Ганцхан нийтлэлээс болж бүх зүйл өөрчлөгддөггүй” гэдгийг л сайн ойлгож авлаа” хэмээн “slon.ru” сайтад өгсөн ярилцлагадаа дурьджээ.

Төрийн Думын сонгууль бо­ло­хоос долоо хоногийн өмнө Засгийн газрын мэдлийн “Риа Новости” мэдээллийн агентлагийн сэтгүүлч Григорий Окотин Нэгдсэн Орос намын кампанит ажилтай холбоотой таагүй мэдээлэл цацсаныхаа төлөө халагдаж, шүүхээс түүнд торгууль төлөх шийтгэл ноогдуулсан юм. Харин өнгөрсөн сар “gazeta.ru” мэдээллийн сайтын орлогч эрхлэгч Роман Баданин Нэгдсэн Орос намыг шүүмжилснийхээ төлөө мөн л халагдсан. Харин Төрийн Думын сонгуулийн санал хураалт явагдаж байх үед Оросын мэдээлийн сай­туудын дийлэнх нь хакерын халд­лагад өртөж, хэсэг хугацааны турш үйл ажиллагаагаа явуулж ча­­дах­гүйд хүрч байв. Түүнчлэн сон­гуулийн өмнөхөн В.Путин руу гут­лаа шидэж, түүнийг эсэргүүцэн шү­гэлдэж байсан залуусын тухай бич­лэг Оросын телевизүүдээр арай өөр агуулгатай мэтээр цацагдаж бай­лаа. Ямартай ч Кремлийн удир­даг­чид хэвлэл мэдээллийн салбарт онц­гой анхаарал хандуулж байна. Даш­рамд дурьдахад, Оросын тэр­бумт­нуудын нэг Михайль Про­хоров ур­жиг­дар ОХУ-ын Ерөн­хийлөгчийн сон­гуульд нэр дэвшихээ мэдэгдсэн. Тэр­бээр “Коммерсант”-ын хувь­цааг худалдаж авах хүсэлтэй бай­гаа­гаа илэрхийлэхийн зэрэгцээ сон­­гуу­лийн дүнг эсэргүүцэн жаг­сагч­дыг дэмжиж буйгаа сануулсан юм.
Өнгөрсөн амралтын өдрүүдэд олон арван мянган хүн оролцсон эсэргүүцлийн жагсаал болсон. Энэ нь Кремлийн удирдагчид болон сөрөг хүчнийнхний хооронд үүссэн хурцадмал байдлыг хөөрөгдөж өгсөн юм. Жагсаалын дараа буюу уржигдар ОХУ-ын Ерөнхийлөгч Дмитрий Медведев сонгуультай холбоотой санал гомдлыг шалгахаа амласан. Гэхдээ тэрбээр шинэхэн парламентын анхны хурлыг энэ сарын 21-нд явуулахаар болс­ноо мэдэгдсэн. Өөрөөр хэлбэл, жагсагчдын тавьж буй дахин сонгууль явуулах саналыг хү­лээж авахгүй гэдгээ давхар сануул­сан хэрэг болов. Харин үүнд ха­риу болгож сонгуулийн дүнг эсэр­гүүцэгчид энэ сарын 24-нд илүү өргөн хүрээг хамарсан том жагсаал зохион байгуулахаа амласан. Үүнтэй холбоотой мэдээлэл интернэтээр хурдацтай тарж байна.

Орос улс 140 сая хүн амтай. Гэтэл өнгөрсөн амралтын өдөр Москвад болсон жагсаалд 50 мянган хүн л оролцсон. За больё, жагсагчдын хэлж байгаачлан тэнд 100 мянган хүн ирсэн болог. Санкт-Петербургт 10 мянга, Новосибирскт гурван мянга, бусад хотод хэдэн зуун хүн. “Сибирь, Урал орчмын 80 хотод хүмүүс жагссан” гэдэг сүрдмээр боловч өргөн уудам Орос орны хэр том хэсгийг төлөөлж чадах вэ гэж бодохоор хариугүй тоо болоод явчих нь. Тиймээс Оросын тэмцэгчдийг үр дүнд хүрэхгүй гэж үзэх хүн олон байгаа юм. Гэвч тийм биш. ЗХУ задарснаас хойш Орост сонгууль болох бүрт Нэгдсэн Орос намд ялагдсан сөрөг хүчнийхэн “Сонгуулийн дүн булхайтай гарлаа” хэмээн мэдэгдэж байсан. Тэр тоолонд ядаж 100 мянган хүн оролцсон жагсаал ч болж байсангүй. Кремлийн өндөр хананы урд хэн ч “В.Путингүй Орос орны төлөө!” хэмээн зоригтой хашгирч чаддаггүй байв. Эрх баригчдаасаа айсан оросуудад үл­гэр дууриал болох гадны улс ор­нууд байсангүй. Өмнө нь Арабын орнуудад гарсан шиг хувьсгалын цуурай ч сонсогддоггүй байв. Гэтэл өнөөдөр хаа байсан ардчилсан Аме­рикт “Уолл Стрийтийг эзэл” хө­дөлгөөн гарч, капитализмыг шүүмж­лэгсэд эгнээндээ олон сая хүнийг нэгтгэж, хаалттай нийгэм бүхий Хятадын эрх баригчид ард түмнийхээ бухимдлыг намжаахын тулд эрвийх дэрвийхээрээ аргадаж сууна. “Фэйсбүүк”, “Твиттер” гэх мэт олон нийтийн сүлжээ сай­туудыг ашиглан хүмүүсийг асар богино хугацаанд нэгтгэн цуг­луулах боломж бүрдсэн. Ийм үед Кремлийн удирдагчид жагсаалд оролцож буй иргэдийн эсэргүүцлийг хэр удаан “дарж” тэсэх бол. Гэхдээ үнэхээр эсэргүүцэгчдийн хүсч байгаачлан өргөн уудам Орос ор­ныг нэгтгэн зангидсан В.Путин гэдэг хүн байхгүй болбол эмх замбараагүй байдал газар авч, ба­рууны орнуудын ашиг сонирхлоо илэрхийлэх талбар, АНУ-ын Ойрхи Дорнод шиг болчихыг үгүйсгэхгүй. Тиймээс магадгүй В.Путиний үнэ цэнэ тэгтлээ доройтчихоогүй ч байж мэднэ. Гэвч түүнийг үнэлэх үнэлэмж үгүй болох хувьсгалын тохироо нь хэдийнэ бүрдчихээд байгаа бололтой.