Ерөнхий боловсролын сургууль, цэцэрлэгийн багш нар хугацаагүй ажил хаялт  зарлаад хоёр хонож байна. Дээрх нөхцөл байдалтай холбогдуулан Үйлдвэрчний эвлэлийн холбооны ерөнхийлөгч С.Ганбаатар болон холбогдох албаныхан өнөөдөр мэдээлэл хийлээ. С.Ганбаатар энэ үеэр “Боловсролын салбарын ажилтнууд цалингаа нэмүүлэхээр тэмцэл эхлүүлсэн бол эрүүл мэндийн салбарын ажилтнууд өнөөдрөөс эхлэн энэхүү тэмцэлд нэгдэж байна. Мөн Урлаг, соёлын салбарын ажилтнууд, Монголын үйлдвэрчний эвлэлийн байгууллагууд нэгдэж байгаагаа илэрхийлсэн” гэлээ.

Тодруулбал, багш нарын ажил хаялт дээр Эрүүл мэндийн салбар, хүчний байгууллагынхан буюу цагдаа, Онцгой байдлын ажилчид, урлагийн байгууллагынхан нэгдэхээр болжээ. Эдгээр салбарынхан өнөөдөр төрийн өндөр албан тушаалтнуудад шаардлага хүргүүлсэн байна. Шаардлагад, төрийн үйлчилгээний албан хаагчдын /Боловсрол, эрүүл мэнд, соёл урлаг, онцгой байдал,  цагдаа/ цалин болон ахмадуудын тэтгэвэр, хувийн хэвшил, үйлдвэрийн ажилтнуудын цалинг 2012 оны нэгдүгээр сарын 1-нээс эхлэн нэмэгдүүлэхийг хүсчээ. Хэрэв энэ шаардлагыг хүлээн зөвшөөрөхгүй бол дээрхи салбарынхан ажил хаяна гэдгээ өнөөдөр албан ёсоор мэдэгдээд байна.