УИХ-ын Нийгмийн бодлого, боловсрол, соёл, шинжлэх ухааны байнгын хорооны хуралдаан өнөөдөр зарлагдаагүй байсан ч, үдээс хойш 15.00 цагт зарлаж, 15.30 цагийн орчимд хуралдаанаа эхлүүллээ. Тус хуралдаанаар Нийгмийн халамжийн тухай хуулийн төслийн шинэчилсэн найруулгын төслийн анхны хэлэлцүүлгийг хийсэн юм. Ингэхдээ зарчмын зөрүүтэй саналын томъёоллуудаар санал хураалгаж, дэмжүүлснээр эл асуудлыг чуулганы нэгдсэн хуралдаанд оруулахаар болж тогтлоо.

Уг хуулийг УИХ жилийн өмнө хэлэлцээд “Хэлэлцэх нь зүйтэй” хэмээн үзсэн байлаа. Гол нь амьжиргааны баталгаажих төвшнөөс доогуур орлогтой иргэнийг тодорхойлохдоо өрхөөр нь үү, аль эсвэл хүнээр тогтоох уу гэдэг маргаантай байдлаас үүдээд хэлэлцүүлгийг урагшлуулж чадаагүй билээ. Гэхдээ ирэх оны зургадугаар сараас хойш Хүний хөгжлийн сангаас иргэн бүрт олгож байсан 21 мянган төгрөг зогссоноор олон өрхийн амьжиргаа хүндрэх учраас түүнээс урьтаж Халамжийн тухай хуулийн төслөө УИХ-аар баталж, хэрэгжихэд бэлэн болгох талаас нь арга хэмжээ авахгүй бол цаг хугацааны хувьд оройтож болзошгүй нь гэж үзэн, хоёр талдаа үзсэнээр ийнхүү хэлэлцүүлгийг урагшлуулахаар чармайж эхэллээ.