БНХАУ-ын нийслэл Бээжин хотноо Дэлхийн оюуны спортын наадамд оролцож буй Монгол Улсын Гавьяат тамирчин, их мастер Д.Эрдэнэбилэг өчигдөр дөрөв дэх тоглолтоо хийж, Хятадын даамчинг хожжээ. Шатар, 100 буудалт даам, бриж, го даам, хятар шатар гэх оюуны спортын таван төрлөөр зохиогдож буй тус тэмцээний даамын тэмцээнд шилдэг 12 даамчин өрсөлдөж байгаа бөгөөд Монголыг төлөөлөн Д.Эрдэнэбилэг ганцаараа Дэлхийн оюуны спортын наадамд ухаанаа уралдуулж буй.

Тэрбээр өчигдөр Хятадын даамчин Жоу Вейтэй цагаанаар тоглож, хожсоноор нийт 29 оноотой болж, хоёрдугаар байр руу дэвшлээ. Тэмцээнд нийт 12 даамчин хоёр хэсэгт хуваагдан өрсөлдөж байгаа ба Д.Эрдэнэбилэгийн хувьд нэгдүгээр группт хоёрдугаар байрт бичигдээд байгаа юм. Тэрбээр өнөөдөр дэлхийн таван удаагийн аварга, ОХУ-ын их мастер Александр Георгиевтэй цагаанаар нүүж байна. ОХУ-ын даамчны тухайд 39 оноотой хэсгээ тэргүүлж байгаа юм. Даамчид хэсэгтээ тойргоор тоглох бөгөөд хоёр хэсгээс шалгарсан тус бүр хоёр тамирчин хагас шигшээд өрсөлдөнө.