“Улаанбаатар кино наадам-2011”-ийн баримтат киноны төрөлд тэргүүн дээд шагналт хүртсэн “Тайгын дууч” баримтат кино АНУ-д жил бүр зохиогддог Нью-Йоркийн олон улсын кино наадмын шилдэг бүтээлээр шалгарчээ.  Өнгөрсөн арваннэгдүгээр сарын 17-24-нд болсон уг наадамд 36 орноос шалгарсан шилдэг бүтээлүүд өрсөлдсөн байна. Шилдэг баримтат киногоор шалгарсан “Тайгын дууч” бол Соёлын гавьяат зүтгэлтэн, сэтгүүлч Г.Золжаргал, түүний хүү зураглаач, найруулагч З.Батбилэг нарын хамтын бүтээл юм.

Монголоос анх удаа сойсон бүтээл наадмын эхний шатанд шалгарч “Тop notch and exellent” буюу дээд зэрэглэлийн гэсэн үнэлгээ авч эцсийн шалгаруулалтад өрсөлдөх эрх авчээ. Энэхүү наадмын үеэр “Тайгын дууч” киног Нью-Йоркийн “Quad” кино театрт гаргажээ. Хөвсгөл аймгийн Улаан-Уул сумын клубийн ардын дууны багш Н.Цогбадрах “Дархад” дууны багш хэмээх орон тоог соёлын төвд анх удаа бий болгож, ардын дуу дуулдаг Н.Цогбадрахыг сум, орон нутгийн дуулах авьяастай хүүхдүүдэд дархад дуу хэрхэн дуулах талаар зааж багшилж байна. Нөгөөтэйгүүр Н.Цогбадрах нутгийн хөгшчүүлтэй уулзаж, тэдний яриа, дуу хуурыг тэмдэглэн авахын зэрэгцээ өөрөө давхар суралцаж байгааг өгүүлжээ. 

“Тайгын дууч” баримтат киног ардын дуу хуур, хэл яриаг устгалгүй авч үлдээхэд соёлын ажилтнууд ихээхэн санаачлагатай байж эрэл хайгуул хийхийн ач холбогдлыг чухалчилж бүтээжээ. Мөн дархад нутгийн ард түмний эгэл жирийн амьдрал, ахуй байдал, өвлийн жавартай хүйтнийг догшин хатуу, цас мөсөнд хучигдсан байгалийн гоо үзэсгэлэн зэргийг бодитойгоор зураглан үзүүлэхийг зорьсон байна.

Сэтгүүлч Г.Золжаргал, найруулагч З.Батбилэг нар сүүлийн таван жилд 20 гаруй баримтат кино бүтээсэн бөгөөд АНУ-ын Колорадогийн Теллюрайд хотноо болсон олон улсын кино наадам, Чикагод болсон дэлхийн хүүхдийн кино наадамд “Нарны тоостой морины хүүхдүүд” киногоороо амжилттай оролцсон юм. Мөн Кыргыз улсад болдог Хүний эрхийн олон улсын кино наадмын тусгай шагналыг хоёр жил дараалан хүртжээ.

“Тайгын дууч” баримтат киноны трейлерийг ЭНД дарж үзнэ үү.