Хятадын хөлбөмбөгийн Супер лигийн “Шанхай Шенхуа” баг нэгэн сонирхолтой мэдээллийг албан ёсны цахим хуудсандаа нийтэлсэн нь Английн Премьер лигийн “Челси” клубын франц довтлогч Николя Анелькатай гэрээ байгуулсан тухай юм. Ирэх нэгдүгээр сард эхлэх өвлийн солилцооны цонхоор франц довтлогч Хятадын багт очихоор хоёр жилийн хугацаатай гэрээ байгуулсан гэнэ. “Николя Анелька манай багт тоглох болсон нь зөвхөн “Шенхуа” багийн хувьд төдийгүй Хятадын хөлбөмбөгт асар их нөлөө үзүүлэх юм. Мэдээж хэрэг Хятадын Супер лигийн нэр хүндийг өсгөнө” хэмээн “Шанхай Шенхуа” багийн вэбсайтад мэдээлжээ.

Гэрээний талаарх дэлгэрэнгүй мэдээлэл одоогоор гараагүй байна. Португаль мэргэжилтэн Андрес Виллаш-Боашийн удирдлага дор Анелька энэ улиралд “Цэнхрүүд”-ийн бүрэлдэхүүнд өдрийн од шиг цөөн удаа гарч, тоглосон. Тиймдээ ч өвлийн солилцооны үеэр “Стэмфорд Бриж”-ийг орхих нь тодорхой болоод байсан билээ. Испанийн “Реал Мадрид”, Английн “Арсенал”, “Ливерпуль” зэрэг Европын томоохон клубт тоглож байсан Анелькагийн үнэ 133 сая ам.долларт хүрч, тухайн үедээ дэлхийн хамгийн үнэтэй хөлбөмбөгчдийн эгнээнд багтаж явсан цаг бий.

“Шанхай Шенхуа” багтай холбоотой өөр нэгэн мэдээлэл хүргэхэд, Францын шигшээ багт тоглож байсан Жан Тигана тус багийн дасгалжуулагчаар ажиллах болсон байна. Тэрбээр нэг жилийн хугацаатай гэрээ байгуулсан гэнэ. 16 баг тоглодог Хятадын Супер лигт “Шенхуа” өдгөө 11 дүгээр байрт бичигдээд буй. Тэд 2005, 2006 болон 2008 онд лигийнхээ дэд аваргаар шалгарч байжээ.