Баянхонгор аймгийн Баян-Овоо суманд Хятадын компани үйл ажиллагаа явуулж байгаад химийн хортой бодис алдагдаж, олон айлын мал үхсэн тул үйлдвэрийг нь зогсоосон гэсэн мэдээлэл байдаг. “Спейшл майнз” компани дөрвөн жилийн өмнө тус компанийн тусгай зөвшөөрлийг нь шилжүүлэн авсан байна. Гэвч ТЭЗҮ-ийг дахин боловсруулж, техник технологийн шинэчлэлт хийж байгаа гээд өнөөг хүртэл үйл ажиллагаагаа эхлүүлээгүй аж. Бичил уурхай эрхлэгч нөхөрлөлүүд буюу нинжа нар уг зөвшөөрөлтэй талбайд олборлолт явуулж байна гэсэн гомдлыг “Спейшл майнз” компани гаргасны дагуу Мэргэжлийн хяналтын ерөнхий газраас шалгалт хийсэн байна. Шалгалтаар нэлээд зөрчил илрүүлжээ. Уг талбайд 36 нөхөрлөлийн 200 гаруй хүн ажиллаж байжээ.

Ашиглалтын тусгай зөвшөөрөлтэй талбай дээр нөхөрлөлийн үйл ажиллагаа эхлүүлэх гэж байгаа бол орон нутаг, Ашигт малтмалын газарт хүсэлт гаргаж, “Бичил уурхай” хэлбэрээр ашигт малтмал олборлож болно гэсэн дүгнэлт гаргуулах ёстой. Үүний дараа тусгай зөвшөөрөл эзэмшигч компанийн саналыг авч, аймгийн Засаг даргатай гурвалсан гэрээ байгуулах хэрэгтэй. Гэтэл зөвхөн аймгийн Засаг даргатай харилцан гэрээ байгуулан ажилласан томоохон зөрчил илэрсэн байна. Гэрээ байгуулсан тохиолдолд тусгай зөвшөөрөл эзэмшигчийн адил талбайдаа нөхөн сэргээлт хийж, байгаль орчны бохирдол, эвдрэл доройтол үүсгэхгүй байх үүрэгтэй байдаг. Харамсалтай нь гурвалсан гэрээ хийгдээгүй тул энэ асуудал орхигдчихсон байна. Нинжа нар алтны судал даган 3-3.5 км газарт 10-40 хүртэл метр гүн нүхнүүд ухчихсан байгаа аж.