“Хэзээ ч мартагдахгүй хүрэм” нэртэй нэгэн ном Их Британийн утга зохиолын хамгийн томоохон шагнал болох “Коста”-гийн хүүхдийн шилдэг номын төрөлд өрсөлдөж байна. Чингис хүү болон түүний дүү Нэргүйд тохиолдсон нулимстай, айдастай үйл явдал Британийн уншигч хүүхдүүдэд ихэд таалагджээ. Зохиолч Фрэнк Котрел Боисийн уг ном бестсэллэрийн жагсаалтад дээгүүр бичигдсээр байгаа юм.

“Коста” Британи, Ирландад хамгийн их амжилт олсон, уншигчдад хамгийн ихээр таалагдсан номыг оны шилдгээрээ шалгаруулдаг. Анхны роман, роман, яруу найраг, намтар болон хүүхдийн ном гэсэн таван төрлөөр оны шилдгүүдийг шалгаруулан тус бүр 5000 паундын шагнал өгдөг байна. Харин шилдгийн шилдэг номын эзэн 30000 паунд гардан авдаг. 1971 оноос эхэлсэн уг шагналын 40 дэх жилийн шилдгийн эздийг ирэх нэгдүгээр сарын 25-нд зарлана.