![](https://news.mn/wp-content/archive1/yellow/photo/2011/12/ddd538381c4bcab1/3554c79213c0d2afbig.jpeg)
Өвлийн ид цаснаар гадуур явж байгаад хальтирч унавал хэн нэгнийг буруутнаар тогтоож шийтгэнэ гэнэ. Энэхүү шийтгэлийг Захиргааны хариуцлагын тухай хуулиар зохицуулна гэж байгаа. Ийм шийдвэрийг нийслэлийн Захирагчийн ажлын албанаас гаргасан бөгөөд хэрэгжиж эхлээд нэлээд хэд хонож байна. Гэтэл байгууллагууд энэхүү шийдвэрийг дагаж мөрдөхгүй байгаа нь харагдаад байна. Нийслэлийн хэмжээнд үйл ажиллагаагаа явуулдаг байгууллагууд энэ шийдвэрийг эсэргүүцээд хэрэгжүүлэхгүй байна уу, эсвэл энэ шийдвэр нь асуудалтай байна уу. Үнэнийг хэлэхэд цас орсон үед гадуур явган явах шиг хэцүү ажил даанч байхгүй. Тэр дундаа Сүхбаатарын талбайгаар дайрч өнгөрөх шаардлага гарвал бүр ч баларна гэсэн үг. Яг л мөсөн дээр явж байгаа юм шиг, хальтирч унах байнгын бэлтгэлтэй байх шаардлага гарна. Ер нь Сүхбаатарын талбай гэлтгүй нийслэлд үйл ажиллагаагаа явуулдаг бүх л компаниуд гаднах талбайгаа гантигдаж ирээд л янзалдаг. Гэтэл өвөл болохоор нөгөө гантиган зам нь дан мөс болж хувирдаг нь үнэн дүр төрх. Тэгэхээр нийслэлийн Захирагчийн ажлын албаны гаргасан дээрх шийдвэр нүдээ олсон юм шиг харагдана. Гэхдээ манай Монголчууд чинь их сийрэг толгойтой хүмүүс шүү дээ. Мөнгөгүй болсон оюутнууд байгууллагын үүд бараадаж хальтирч унаад байдаг болчих вий дээ. Аль нэг байгууллагын үүдэнд хальтирч унасан хүнийг өмгөөлж тухайн байгууллагыг торгож болох ч энэ нь торгуулж байгаа компанидаа хүнд дарамт болно. Тиймээс нийслэлийн Захирагчийн ажлын албанаас бас нэг захирамж гаргачихвал болмоор байна. Ерөөсөө өвлийн цагт явган явж байгаа хүмүүс гутлынхаа уланд даавуу нааж яагаад болохгүй гэж. Байгууллагууд л цас цэвэрлэх ёстой, хальтирч унасан хүний гомдлыг барагдуулах ёстой гээд шахаад байхаар арай л шударга биш байна. Явган хүн хүртэл хариуцлага хүлээдэг болчихвол энэ асуудал шийдэгдэх бус уу. Гутлынхаа уланд даавуу наасан хүн аль нэг байгууллагын үүдэнд хальтирч унавал тухайн байгууллага хариуцаж гомдлыг нь барагдуулдаг болъё. Харин гутлынхаа уланд даавуу наагаагүй хүн албан газрын үүдэнд хальтирч унавал тухайн албан газрын үүдний цасыг цэвэрлэдэг болгоё. Ердөө ингээд шийдчихэж болох л юм байна.
Б.Энхмөнх"Улс төрийн тойм" сонин
![](https://news.mn/wp-content/archive1/yellow/photo/2010/9/75003864d109ce06/d1d6baf922dfd472big.jpg)