УИХ-ын Хууль зүйн байнгын хорооны өнөөдрийн хуралдаанаар УИХ-ын гишүүн З.Энхболд нарын өргөн мэдүүлсэн Эрүүгийн хуульд нэмэлт, өөрчлөлт оруулах тухай хуулийн төслийн анхны хэлэлцүүлгийг хийлээ. Төслийн гол агуулга нь ард нийтийн санал асуулгын үед хууль бусаар нэгээс дээш удаа санал өгвөл, мөн Ерөнхийлөгч, УИХ, аймаг нийслэлийн ИТХ—ын сонгуулийн үед нэгээс дээш удаа санал өгөхийг оролдсон, ийм үйл ажиллагаанд татан оролцуулсан нөхцөлд гурваас дээш хугацаагаар баривчлан саатуулах. Мөн энэ үйл ажиллагааг зохион байгуулсан, будилаантуулсан төрийн албан тушаалтан, төрийн өмчийн оролцоотой компанид ажиллаж байгаа алба тушаалтныг албан тушаал эрхлэх эрхийг нь хоёр жилийн хугацаагаар түдгэлзүүлнэ гэж зааж өгсөн байна. Энэхүү төслийг гишүүд хэлэлцээд чуулганы нэгдсэн хуралдаанд оруулахаар болж тогтлоо.

Хоёр дахь асуудал нь УИХ-ын гишүүн С.Эрдэнэ нарын өргөн мэдүүлсэн Эрүүгийн хуульд өөрчлөлт оруулах тухай хуулийн төсөл болов. Энэ нь Үндсэн хуулийн бус аргаар төр барих эрхийг авахыг завдсан бол тухайн этгээдийг 5-10 жилээр хорих, мөн дээрх үйл ажиллагааны явцад хүний амь хохирсон, эд хөрөнгийн их хэмжээний хохирол үүссэн бол буруутай этгээдийг 10-25 жилээр хорино гэж зааж өгчээ. Хэлэлцүүлгийн шатанд УИХ-ын гишүүн Х.Жекей “УИХ-ын сонгууль болсны дараа ялагдсан хэсэг нь хэдэн хүнийг зохион байгуулан жагсаал зохион байгуулвал яах вэ. Энэ тохиолдол нь нэг ёсны Үндсэн хуулийн бус аргаар төрийн эрх барих дээд байгууллагад орж ирэх гэсэн оролдлогын нэг хэлбэр биш үү” гэлээ. Төсөл санаачлагч УИХ-ын гишүүн С.Эрдэнийн тайлбараар бол энэ асуудлыг Жагсаал цуглаан зохион байгуулах тухай хууль болон бусад хуулийн хүрээнд зохицуулагдана. Харин энэхүү хэлэлцэж байгаа төслийн хүрээнд бол арай өөр агуулгатай гэлээ. Монгол Улсын Үндсэн хуульд засаглалын бүх эрх ард түмний мэдэлд байна гэж заасан байдаг. Тийм учраас төрийн эрхийг хууль бусаар авах нь Үндсэн хууль зөрчсөн үйлдэл болох учраас ийм өөрчлөлт оруулахаар тусгасан. Мөн УИХ-ын 2008 оны сонгуулийн үеэр тухайн үеийн Сонгуулийн ерөнхий хорооны дарга нь хууль зөрчсөн байдаг. Гурван шатны шүүхээс түүнийг хууль зөрчсөн гэж үзсэн боловч өөр ажилд томилогдон алба хашиж байгаа. Түүний энэхүү хууль зөрчсөн үйлдлээс бол УИХ-д хууль бусаар хэчнээн хүн сонгогдсоныг хэлж мэдэхгүй. Ийм хууль бус үйлдэл гаргуулахгүй байх талд энэхүү Эрүүгийн хуульд оруулж буй өөрчлөлт нь үйлчлэх учиртай гэлээ.

Энэхүү төслийг мөн тус байнгын хорооны гишүүд дэмжсэнээр чуулганы нэгдсэн хуралдаанд оруулахаар болж шийдвэрлэлээ. Дашрамд сануулахад, дээрх төслүүдийг УИХ өнгөрсөн хавар хэлэлцээд хэлэлцэхийг нь дэмжсэн байсан аж. Ингэхдээ УИХ-ын Сонгуулийн тухай хуулийн төслийг хэлэлцэх шатанд хэлэлцүүлгийг хийх нь оновчтой хэмээн үзэж хойшлуулаад байсныг өнөөдөр ийнхүү нэг шат ахиуллаа.