Египетийн бүх нийтийн сонгуулийн эхний шатанд исламын намууд ялалт байгуулав. Мусальман ахан дүүс хөдөлгөөний Эрх чөлөө, шударга ёсны нам 36,62 хувь, хэт хуучинсаг үзэлтнүүдийн  “Нур” нам 24,36 хувь, Египетийн эвсэл гэх либералууд 13,35 хувийн санал тус тус авчээ.

Энэ удаагийн сонгуулийн үр дүн төгсгөлийнх биш бөгөөд 2012 оны нэгдүгээр сар хүртэл дахин хоёр шатны сонгууль явагдана. Арванхоёрдугаар сарын 5-нд эхэлж байгаа хоёр дахь шатны сонгуулийн дараа гарсан үр дүнг эхний шатныхтай нэгтгэн парламентыг байгуулах юм. Шинэ парламент нь 100 хүнтэй комисс байгуулан шинэ Үндсэн хуулийн төслийг боловсруулах ажээ.