Төрийн шагналт яруу найрагч Р.Чойномын нэрэмжит Хэнтий аймгийн нийтийн номын сангаас Монгол Улсад орчин үеийн номын сан үүсч хөгжсөний, Үндэсний номын сангийн 90 жилийн ойн баярыг өнгөрсөн долоо хоногт тэмдэглэн өнгөрүүллээ. Үндэсний номын сангаас зарласан “Шилдэг номын санч” шалгаруулах уралдаанд Биндэр сумын соёлын төвийн номын санч Ц.Сарантуяа,  Дархан сумын соёлын төвийн номын санч Ц.Батчулуун, Өмнөдэлгэр сумын ЕБС-ийн номын санч Д.Эрдэнэчимэг, Баян-Овоо сумын ЕБС-ийн номын санч Б.Ганцэцэг, төв номын сангийн нийтийн уншлагын танхимын номын санч А.Мөнхцэцэг нар оролцож, улсын хэмжээний шилдэг номын санчаар Б.Ганцэцэг шалгарлаа

Ахмад номын санч, Монгол улсын соёлын тэргүүний ажилтан Н.Рэнцэнноров, Б.Ханд нар “Ном дагасан он жилүүд” нэртэй дурсамж номыг Өндөрхаан хотод хэвлүүлсэн байна. 90 жилийн ойг тохиолдуулан номын санд олон жил үр бүтээлтэй ажиллаж байгаад өндөр насны тэтгэвэрт гарсан зургаан ахмад ажилтан, Монгол Улсын Соёлын тэргүүний ажилтан цол тэмдгээр, мөн БСШУЯамны "Жуух бичиг"-ээр нэг хүнийг шагнууллаа. Мөн аймгийн Засаг даргын өргөмжлөлөөр гурав, Ардын хувьсгалын 90 жилийн ойн медалиар дөрөв, “Соёлын түшиг” холбооны "Соёлын гавьяа” одонгоор нийт 10 хүн тус тус шагнуулжээ. Түүнчлэн гурван үеийн номын санчдын уулзалтыг зохион байгуулж, номын сангийн захирлаар 1970-1983 онуудад ажиллаж байсан Н.Рэнцэнноров, 1983-1994 онуудад ажиллаж байсан Д.Эрдэнэбаатар, 1994-2004 онуудад ажиллаж байсан Б.Дуламжав болон үе үеийн номын санчид оролцов.