Грекийн хувь заяаг санхүүгийн асар том бэрхшээлтэй тулгараад байгаа Португали давтах уу гэсэн асуулт олон улсын хөрөнгө оруулагчдыг зовоож байна. Мягмар гаригт гаргасан “Стэндард энд Пурс” агентлагийн чансаа Португалийн үнэлгээг хоёроор доошлуулан “+А”-гаас “-А” зэрэглэлд тавив. Португали өөрийн өр төлөлтийн асуудлаа цэгцлэнэ гэдэг эргэлзээтэй байгаа учраас түүний чансааг доошлуулсан гэж дээрхи агентлаг мэдээлжээ. Португалийн Сангийн сайд зах зээлийн энэ цохилтод улс орон нь хариулт өгч чадна гэсэн байна. “Хямрал дуусаагүй байгаа учир бид хүчин зүтгэлээ тэргүүлэх гол асуудлыг шийдэхэд чиглүүлэх болно. Аль болох хурдан үүнийг шийдэх ёстой” гэж сайд мэдэгдлээ.

Социалистуудын Засгийн газар төсвийн алдагдлыг 2013 он гэхэд дотоодын нийт бүтээгдэхүүний гурван хувьтай тэнцэх хэмжээнд хүртэл багасгахаар амлаад байгаа билээ. Европын холбоо ч Португалид асуудлаа шийдэхэд нь Грекээс илүүтэй боломж буйг хэлж байна.