“Манай цалингаас гараа тат, ОУВСангийн тусламж биднийг дөнгөлж байна! ” гэсэн уриан дор Грекийн нийслэлийнхэн жагслаа. Засгийн газрынх нь хямралаас гарахаар авч байгаа арга хэмжээ олны дургүйцлийг төрүүлжээ. Засгийн газар төрийн албан хаагчдын цалинг хасч нийт татварын хэмжээг нэмэгдүүлсэн юм. Мөн тэтгэвэрт гарах насны заагийг нэмэгдүүлэх гэнэ. Шинэ эсэргүүцэл нь Грекийн зээлийн чадварын чансааг гаргасан Standard and Poor’s агентлагийн үнэлгээтэй давхацлаа
.
Харин энэ талаар Грекийн Сангийн сайд Йоргос Папаконстантину  сандрах хэрэггүй гэж үзэж байна. “Чансааны үнэлгээ нь эдийн засгийн бодит байдал эсвэл татварын нөхцөлийг тодорхойлохгүй. Мөн ОУВС ба Европын холбоотой гэрээ хэлцэлээ гүйцээн тохироход ч нөлөөлөхгүй” гэж тэр телевизээр яриа өгөхдөө хэлжээ. Гэхдээ л Стандард энд пур агентлаг Афины зээлийн чадварын чансааг гурваар доошлуулсан нь Грекийн өр төлөх системд сүйрэл далласан хэрэг болов. Сангийн яамны үнэт цаас нь хөрөнгө оруулалтын чансаагаа алдаад Европын банкуудад зөвхөн баталгааны бичиг болж эхэллээ. Европын нэгдсэн валют ч тийм үнэлгээний дараа доллартай харьцуулсан ханшаа 1,52 хувиар алдаж байгаа юм байна.