УИХ-ын чуулганы нэгдсэн хуралдаан хаалттай горимоос нээлттэй горимд шилжиж,  Монгол Улсын Ерөнхийлөгчөөс санал болгосон Элчин сайд нарыг эргүүлэн татах болон Элчин сайд нарыг томилох тухай асуудлыг хэлэлцлээ. Тодруулбал, О.Даваасамбууг Монгол Улсаас Куба улсад, С.Баярааг Энэтхэг улсад, С.Хүрэлбаатарыг Япон улсад, Т.Жанабазарыг Лаос ард улсад, Б.Дэлгэрмааг Сингапур улсад суух Онц бөгөөд Бүрэн эрхт Элчин сайдаар томилуулахаар  санал болгосныг тус тус дэмжин, баталлаа. Харин бүрэн эрх нь дуусгавар болсон Элчингүүдийн хувьд дурдвал Куба улсаас Я.Долгоржавыг, Энэтхэг улсаас В.Энхболдыг, Япон улсаас Р.Жигжидийг, Лаосоос Т.Батбаатарыг, Сингапур улсаас Л.Гансүхийг эргүүлэн татах асуудлыг ёсоор болголоо.

УИХ-ын дарга шинээр томилогдсон Элчин сайд нарт ажлын амжилт хүсч, Монгол Улсын гадаад харилцааг шинэ түвшинд гаргах, хоёр улсын эдийн засгийн харилцааг өргөжүүлэхэд санаачлагатай ажиллаж үр дүн гаргахыг мөн захилаа.