Олон улсын оюутны спортын холбооны (ОУОСХ) Гүйцэтгэх хорооны хурал Бельги улсын Бруссел хотноо арваннэгдүгээр сарын 28, 29-нд болж, ОУОСХ-ны үйл ажиллагаа, 2012 онд зохион байгуулах дэлхийн оюутны аварга шалгаруулах тэмцээн, 2013, 2015 оны өвөл, зуны Универсиад наадмын бэлтгэл ажлын явцтай танилцан 2017 оны өвөл зуны Универсиад их наадмыг зохион байгуулах улсуудыг сонгон шалгарууллаа. Тус хуралд ОУОСХ-ны ерөнхий санхүүч, Монголын оюутны спортын холбооны ерөнхийлөгч /МОСХ/ Д.Баясгалан оролцсон юм.

Гүйцэтгэх хорооны хурлаар 2016 оны Байт харвааны дэлхийн оюутны аварга шалгаруулах тэмцээнийг Монгол Улсад зохион байгуулах эрхийг олгосон бол 2014 оны байт харвааны ОДАШТ-ийг Бельги улсад зохиох эрхийг тус тус олгожээ. Түүнчлэн  зуны 29 дүгээр Универсиад их наадмыг 2017 оны зохион байгуулах эрхийг авахаар Бразили, Хятадын Тайвань нэр дэвшүүлэн өрсөлдөж, Гүйцэтгэх хорооны гишүүдийн эцсийн саналаар Тайваньд эрх олгосон байна. Харин 2017 оны өвлийн 28 дугаар Универсиад их наадмын эрхийг Казакстан улсын Алматы хотод олгожээ.