ШШГЕГ-ын харьяа “Сүлд” спорт хороо, “Оюутолгой” компанийн элч тамирчин, Монгол Улсын Хөдөлмөрийн баатар, Гавьяат тамирчин Х.Цагаанбаатар, “Сүлд” спорт хорооны тамирчин, ОУХМ Д.Төмөрхүлэг нарыг Амстердамын гран-при тэмцээнд амжилттай оролцсоныг нь үнэлэн ШШГЕГ-ын удирдлагууд өнгөрөгч даваа гаригт хүлээн авч, уулзан баяр хүргэж, мөнгөн шагналаар урамшуулав. Мөн тус байгууллагын албан хаагчид хоёр тамирчиндаа хүндэтгэл үзүүлсэн юм.

Энэ үеэр Гавьяат тамирчин Х.Цагаанбаатартай цөөн хором ярилцлаа.

-Амстердамаас медаль авсанд, мөн байгууллагаасаа шагнуулсанд баяр хүргэе. Сэтгэгдэл ямар байна вэ?

-Сэтгэл их өндөр байна. ШШГЕГ-ын хамт олон маань бид хоёрыг хүлээн авч хүндэтгэл үзүүлсэнд талархаж байна. Цаашид хамт олныхоо болон Монголын ард түмнийхээ итгэлийг алдахгүй улам сайн хичээж барилдан олимпийн оноогоо ахиулах болно.

-Бэлтгэл сургуулилт хэр байна. Одоо ямар тэмцээнд оролцох вэ?

-Монголын жүдочид Солонгосын Чежү хотод болох Дэлхийн цомд нэлээд өргөн бүрэлдэхүүнтэй оролцохоор бэлтгэлээ базаагаад явах гэж байна. /Чежүг 50 орчим тамирчин зорьж байгаа бөгөөд өнөөдөр өглөө эх орноосоо мордлоо/. Үүний дараа Токиогийн “Их дуулга”, Чиндаогийн гранприд зодоглоод ирэх сарын сүүлээр эх орондоо ирэхээр төлөвлөж байгаа.

-Бэртэл гэмтэл эдгэсэн үү?

-Дажгүй сайн байгаа. Бэлтгэлдээ эрчимтэй орчихоод байж байна.

Олон улсын хэмжээний мастер Д.Төмөрхүлэгийг сэтгэгдлийн сонслоо.

-Баяр хүргэе. Сэтгэгдэл ямар байна вэ?

-Баярлалаа. Шагнал авсандаа маш их баяртай байна.

-Голландын тэмцээнээс алтан медаль хүртсэн. Барилдааныхаа талаар сонирхуулбал?

-Түрүүлэх зорилготой барилдсан. Зорилгодоо хүрч чансааны 200 оноо авсан. Барилдааныхаа үр дүнд сэтгэл хангалуун, баяртай байгаа.

-Чансааны хувьд нэлээд том өөрчлөлт гарсан уу?

-Тийм ээ. Энэ тэмцээний өмнө 15 дугаарт бичигдэж байсан. Харин одоо наймдугаар байрт орж ирлээ.