Оросын олимпийн хорооны 100 жилийн ойд зориулсан арга хэмжээ 2011 оны туршид өрнөж, өнгөрөгч бямба гаригт Москвад болсон Олимпийн гала ёслолоор оргил арга хэмжээ нь өндөрлөв. Гала ёслолд Ирина Роднина, Алексей Немов, Елена Дементьева, Евгения Канаева зэрэг спортын алдартнуудаас гадна ОХУ-ын ерөнхий сайд Владимир Путин, Олон улсын олимпийн хорооны ерөнхийлөгч Жак Рогге зэрэг салбар салбарын томчууд оролцов.

Ёслолын үеэр тус Олимпийн хорооны ерөнхийлөгч, ОХУ-ын Ерөнхий сайдын орлогч Александр Жуков сэтгүүлчдийн асуултад хариулахдаа “Бид Лондонд багийн дүнгээр хоёрдугаарт орох бүрэн боломжтой. Олимпийн өмнөх жилийн дүнгээс үзэхэд бид АНУ-ын багаас яльгүй хоцорч явна. Манай бөхчүүд, боксчид арай дөмөг өрсөлдсөн бол тэднээс илүү гарахаар байлаа. Нөгөө талаар хөнгөн атлетикийнхан маань тооцоолсноос дээгүүр амжилт үзүүлсэн” гэжээ. 2011 онд болсон олимпийн төрлийн спортуудын ДАШТ-үүдэд БНХАУ 40 алт хүртэн өнгөлсөн бол АНУ 33, ОХУ 27 алттайгаар удаалсан юм. Нийт медалийн тоогоор ч нанхиадууд (94) тасархай тэргүүлж, АНУ 74, ОХУ 72-оор айрагдлаа.